Pơma tơ̆hop akŏm, Phŏ Thủ tướng Trần Hồng Hà pơma hơdăh, khei ‘năr âu, hla ar tơroi kach mang Việt Nam hlôi chih tơ roi ‘lơ̆ng hơiă rim tơdrong arih sa tơpôl, jơhngơ̆m đon ‘meh vă đơ̆ng kon pơlei. Hla ar chih tơroi jang ‘lơ̆ng hơnăp jang iung jang lơ̆m rim tơdrong jang đon tơchĕng - kơtơ̆ng ang - tơroi tơbăt, năm hơdrol lơ̆m tơdrong păr ang tơdrong kơtơ̆ng ang ƀlep; um rup kơ Việt Nam “sơđơ̆ng, rơngei, tơbôl, hơtŏk tơiung”.

Phŏ Thủ tướng Trần Hồng Hà athei dôm kơdră Khŭl kăl kơ tơƀôh trong ăn dôm anih jang chih kơtơ̆ng ang chih ƀlep tơdrong yan âu, tôm tơdrong arih sa vă đei lơ ƀai chih kơtơ̆ng ang ‘lơ̆ng, hơtŏk tơdrong iung jang, tơdrong ‘lơ̆ng gĭt kăl. Dôm anih jang chih kơtơ̆ng ang hơnơ̆ng pơ jing khŭl jang chih kơtơ̆ng ang gơh hơgei, gơh lăng ‘noh jĭ dôm bơngai joăt jang găh mŭk drăm, jang tơbôl, joh ayŏ, kơmăy kơmŏk.