Phŏ Thủ tướng hmach bơnê kơ tơdrong axong jang, tĕch pơdro đei jơnei, kơ Anih jang LG pơma atŭm păng Kŏng ti LG Display pơma adrô̆ tơ̆ Việt Nam, tơgop kăp gĭt lơ̆m tơdrong hơtŏk mŭk drăm – tơpôl tơ̆ Việt Nam, tơgop pơm hơtŏk tơbôl jang hadoi tôm tơdrong Việt Nam-Hàn Quốc. Phŏ Thủ tướng hơpơi 'moih, Anih jang LG pơtoi pơih xă axong jang tơ̆ Hải Phòng păng dôm tơring kơ Việt Nam; pơkăl Anih jang LG axong ming man minh Anih hơlen hơtŏk tơ̆ Việt Nam. Atŭm hăm noh ăn tơbăt, Thủ tướng teh đak bơ̆n 'nao kĭ pơkăp hơmet Tơchơ̆t atŭm kơ pơlei tơm Hải Phòng truh xơnăm 2040, xơkơ̆t truh xơnăm 2050 hăm pơkăp axong teh pơm jang vă hơtŏk kŏng ngĭp, kiơ̆ đơ̆ng noh pơm trong hiôk ăn dôm anih axong jang, lơ̆m noh đei Anih jang LG pơih xă axong jang tơ̆ pơlei tơm Hải Phòng.