Pơgơ̆r lơ̆m 2 năr (23-24/9), Năr lêh pơjing tơdrong jang tơplih ‘nao tơchăr hle dêh char Dak Lăk sơnăm 2024 (Techfest Dak Lăk 2024) đei lơ tơdrong pơgơ̆r nhen: pơdă tơroi tơbăt rim tơdrong vă jang, tơmam drăm pơjing tơdrong jang, OCOP, kmăi kmŏk choh jang sa, tơgŭm ăn tơmang pơhiơ̆; mĭnh ƀar tơdrong rơvơn găh pơjing tơdrong jang tơplih ‘nao tơchăr, pơjing tơdrong jang rơgoh ‘lơ̆ng, trong pơtrŭt kơtang pơjing tơdrong jang lơ̆m rim tơdrong jang, rim khul bơngai. ‘Nou đei pơgơ̆r rim sơnăm, vă pơjing rơvơn tơƀơ̆p dih băl lơ̆m khul pơjing tơdrong jang, tơgoăt tơmơ̆t jên jang, tơchă bơngai tech răt dih băl, tơchă hơnih răt iŏk. Ƀok Nguyễn Tuấn Hà, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk tơbăt, rim tơdrong jang tơgŭm djru pơjing tơdrong jang tơ̆ dêh char hlôi pơjing đei hơ yak hơ iă, tơgop tơ iung pơjing trong pơjing tơdrong jang tơ̆ Dak Lăk atŏk tơ iung ‘lơ̆ng, lang să hloh dơ̆ng lơ̆m rim răih kon pơlei pơla.