Pơ gê hei ‘năr 17/3 tơ̆ Hà Nội, pơgơ̆r Năr hla ar tơroi lơ̆m teh đak 2023. Năr hla ar tơroi pơgơ̆r lơ̆m 3 năr đơ̆ng ‘năr 17/3 truh ‘năr 19/3 hăm hơnăn “ Mĭnh ƀơ̆r đon - Jang hơdai - Joh ayŏ - pơcheh hơgei”. Năr hla ar tơroi lơ̆m teh đak sơnăm ‘nâu hăm 87 kơ deng pơdă đơ̆ng 63 Khŭl chih hla ar tơroi dêh char, pơlei tơm, 60 anih jang chih kơ tơ̆ng ang Trung ương păng tơring, kŭm hăm dôm kơdeng pơdă hla ar chih tơroi hơiă đơ̆ng dôm Drŭp Chi hội: Hla ar tơroi Kon pơlei, Anih radio nơ̆r pơma Việt Nam, Anih pơdăh ti vi Việt Nam, Thông tấn xã Việt Nam, Anih tơm vei lăng găh tơdrong kơ tơ̆ng ang păng tơroi tơbăt.... păng tơdrong vang bơ̆jang đơ̆ng grŭp dôm anih jang pơtho pơhrăm hla ar chih kơ tơ̆ng ang, hơnih pơdă đơ̆ng dôm anih jang pơtruh tơmam hla ar chih kơtơ̆ng ang - tơroi tơbăt ‘nao.

Tơdrong hơiă đơ̆ng năr hla ar tơroi sơnăm ‘nâu ‘noh jĭ tơdrong kăl găh tơdrong jang hla ar kơtơ̆ng ang, nhen Pơma đam tơƀơ̆p dơ̆ng jơnei A Hla ar tơroi teh đak đei pơih pơ rê kơtă lơ̆m hơyuh kơ Anih radio nơ̆r pơma Việt Nam; Hop akŏm A.I păng vei lăng pơcheh hơgei tơdrong lơ̆m hơnih chih hơmet ming... Kiơ̆ đơ̆ng noh bơngai jang chih kơ tơ̆ng ang lơ̆m teh đak păng tơpôl đei tơdrong hiôk tơblang hơdăh păng hŏk pơhrăm ‘moi kiơ̆ ƀai chih kơtơ̆ng ang hơgei, tơgop hơtŏk hloh dơ̆ng hla ar chih kơ tơ̆ng ang ‘lơ̆ng hơgei hloh.