Anih jang vei lăng kon pơlei xah Hòa Phú, dêh char Đăk Lăk hlôi pơih lăm pơhrăm ăn hloh 140 bơngai hŏk 'noh kang ƀô̆ jang hanh chinh păng tang măt ăn anih jang mŭk drăm lơ̆m tơring. Pơtho noh jĭ dôm bơngai juăt jang gah kŏng ngê̆, bơngai hŏk ưh hơdrô̆ đei tơroi pơtho ăn gah kŏng ngê̆ AI mă oei đei pơtho iŏk yua AI lơ̆m tơdrong pơm jang tơpă kơ po. Ƀok Nguyễn Trung Hòa – bơngai pơtho tơ̆ Hnam trưng Kao đăng Kŏng thương tơring Tŏk bŏk, kơtă pơtho ăn tơbăt: “Anih pha kơ lăm pơhrăm ou pơtêng hăm lơ 'măng khuă pơhrăm nai noh bơngai gơh iŏk yua hloi đơ̆ng rŏng kơ hŏk đang. Nhôn ưh đei kiơ̆ trong pơtho so hlôi đei, mă tơgŭm ăn bơngai hŏk băt hơdah gah tơdrong yua AI vă gơh đei jơnei nhen tơdrong 'meh vă. Rim kang ƀô̆, rim anih jang mŭk drăm gơh kơdih chă chih akŏm ăn kơdih po minh "kơmăi tơgŭm jang AI" tơgŭm ăn kơdih, sek tơlang tơdrong jang gơh tơnăp hloh”

Kiơ̆ khul kơdră xah Hoà Phú, dôm năr blŭng pơm jang kiơ̆ pơkăp jơnŭm pơgơ̆r tơring 2 tăl, tơring ƀơm lơ tơnap tap lơ̆m pơm hla bar hanh chinh ăn kon pơlei păng anih jang mŭk drăm. Mă lơ noh kơyuơ ưh kơ mah kang ƀô̆ juăt jang. Kang ƀô̆ noh bơngai jang so mă lei tơdrong jang noh 'nao, rim lăm jang đei minh ƀar bơngai chŏng mă athei iŏk jang lơ tơdrong jang đơ̆ng rŏng kơ pơkăp tăl jang.

Đơ̆ng tơdrong tơchơ̆t noh, khul kơdră xah Hòa Phú sơkơ̆t hơdah, 'meh tŏ sĕt bơngai mă jang đei lơ tơdrong noh athei kloh klĕch gah tơdrong iŏk yua kơmăi kơsô̆. Lơ̆m noh, iŏk yua kơ̆l 'ngok hơgei đơ̆ng kơmăi kơsô̆ AI jĭ minh trong jang kăp gĭt. Xah hlôi hơvơn bơngai juăt jang gah tơplih kơmăi kơsô̆ păng AI vih pơtho, hăm pơkăp “Hŏk đang noh athei gơh jang hloi”. Ƀok Đỗ Xuân Hiếu – Phŏ Kơdră Anih jang vei lăng kon pơlei xah Hòa Phú, dêh char Đăk Lăk tơroi: “Đơ̆ng rŏng kơ pơhrăm, nhôn athei rim kang ƀô̆, bơngai jang athei đei minh "kơmăi tơgŭm jang AI" kơdih vă akŏm pơm jang. Hơdrol ki, minh tơdrong jang kăl truh 1 năr chih akŏm, mă lei hăm AI noh hiong dang pơhlom 30 giây đĕch. Oei dôm to noh athei kơchĕng, oei tơdrong jang hlôi đei "kơmăi" tơgŭm jang”

Ưh hơdrô̆ tơ̆ xah Hòa Phú, tơ̆ phương Tân An, dêh char Đăk Lăk tơdrong iŏk yua kơmăi kơsô̆ AI lơ̆m pơm hla bar hanh chinh mă blŭng pơm jang đei yua tơnăp. Pơmai Văn Thị Anh Đài – juăt jang hanh chinh kŏng phương Tân An ăn tơbăt: “Iŏk yua kơmăi kơsô̆ AI hlôi pơm trong ƀônh hiôk hơdah ăn kang ƀô̆ juăt jang păng kon pơlei hloi. Hăm kang ƀô̆, nhôn hơlen sơkơ̆t tơdrong jang ƀônh hiôk hloh, sơkơ̆t hơdah hô sơ mă yơ kăl xah hơmet jang. Hăm kon pơlei, AI adoi tơgŭm chă hơlen păng băt đei hla bar mă yơ athei pơm tơ̆ phương, đơ̆ng noh ưh đei huach lơ jơ năr păng hiôk hian hloh lơ̆m tơdrong pơm hla bar hanh chinh”

Tơpă ăn ƀôh, tơdrong iŏk yua AI păng kơmăi kơsô̆ ưh hơdrô̆ pơm tơjur ƀiơ̆ hrat ăn khul kang ƀô̆, bơngai jang tơ̆ tơring, mă oei pơm ƀônh hiôk ăn kon pơlei păng anih jang mŭk drăm ah mă năm pơm hla bar hanh chinh. Yă Phạm Thị Hồng Hải, oei tơ̆ phương Tân An, dêh char Đăk Lăk sơkơ̆t hơdah: “ 'Năr ou unh hnam inh truh pơm hla bar teh păng pơkăp hla bar ăn tơ-'ngla kơdih. Mă blŭng oei pơsuơ̆k pơsuơ̆l, mă lei đei kang ƀô̆ tơroi hơdah rim tơdrong pơkăp pơm noh hô sơ keh đang tenh kuăng. Đơ̆ng rŏng kơ nôp, inh đei iŏk hloi hla bar pơkă năr lơ̆m điê̆n thuăi hăm năr pơkăp iŏk hla bar hlôi pơm keh đang, ƀônh hiôk tơpă".

Vă todrong iŏk yua kŏng ngê̆ gơh tơnăp, tơdrong yak hơdoi đơ̆ng dôm anih jang gah viên thŏng – kơmăi kơmŏk 'nao noh kăp gĭt hloh. Khei năr ou ki, rim anih jang viên thŏng hlôi hăt hot vang pơm jang hăm jơnŭm pơgơ̆r rim tơring vă pơm jang sơnong jang ou. Hơdah nhen Viettel Đăk Lăk hlôi jang atŭm hăm jơnŭm pơgơ̆r tơring tơlĕch lơ trong jang gah kơmăi kơsô̆, 'măn pơm jang kiơ̆ pơkăp jơnŭm pơgơ̆r tơring 2 tăl. Ƀok Nguyễn Thanh Bình – Phŏ Kơdră Viettel Đăk Lăk ăn tơbăt: “Nhôn hlôi tơroi gah kơmăi tơgŭm jang ăn kang ƀô̆, bơngai jang, akŏm lơ̆m hloh 2.000 sơnong jang đei tơrĕk truh 23 tơchơ̆t 'nao gah pơkăp tăl pơgơ̆r tơring đơ̆ng Jơnŭm pơgơ̆r teh đak. Kơmăi tơgŭm jang ou tơgŭm ăn kang ƀô̆ pơm kiơ̆ sơnong jang trŏ nhen tơchơ̆t đơ̆ng khôi luơ̆t tơlĕch, atŭm hăm noh hơtŏk tơdrong pơm jang tơnăp hloh”

Hăm pơkăp “Hŏk đang 'noh athei gơh jang hloi”, dôm lăm pơhrăm gah kơmăi kơsô̆ nhen tơ̆ xah Hòa Phú dah mă phương Tân An kơ dêh char Đăk Lăk tŏk bŏk pơih trong yak 'nao, tơgŭm ăn kang ƀô̆ tơ̆ xah ưh hơdrô̆ hơtŏk kloh klĕch gah kơmăi kơsô̆, mă oei tơplih đon tơchĕng pơm jang, kơchăng pơhrăm gah kơmăi kơsô̆ vă pơvih ăn kon pơlei tơnăp hloh lơ̆m jăl jang 'nao. 'Nou adoi jing trong jang hơdah vă rim tơring tơ̆ dêh char pơm jang đei jơnei Tơchơ̆t 57 đơ̆ng Anih tơm Chinh trĭ gah khua hŏk – kŏng ngê̆ păng tơplih 'nao gơh hơgei.