Hop akom hlôi pôk rơih Khul kơdră chĕp pơgơ̆r ‘nao. Ƀok Lương Quốc Đoàn hơnơ̆ng đei pôk tơmơ̆t jang dơ̆ng Kơdră chĕp pơgơ̆r Trung ương Khul kon pơlei choh jang sa Việt Nam jăl IX. Yak mơ̆t lơ̆m chăl hle, Khul tơplih kơtang, tơlĕch trong jang tơmơ̆t dơ̆ng 500.000 ‘nu bơngai, tơgŭm pơjing tŏ sĕt hloh 5.000 hơnih mơdro sa choh jang sa păng pơtho pơhrăm tơdrong gơh jang kơsô̆ ăn tŏsĕt hloh 70% ‘nu bơngai lơ̆m khul. Hop akom hlôi pơdrơ̆ng kiơ̆ rim trong atŏk kơtang vă tơ iung pơjing khul choh jang sa gơh hơgei, pơtrŭt choh jang sa rơgoh ‘lơ̆ng păng tơplih kơsô̆, pơjing hơyak pran kơjăp ba tơmam drăm choh jang sa Việt năm truh lơ̆m apŭng plĕnh teh. Iung pơma pơrô̆ tơ̆ Hop akŏm, ƀok Trần Cẩm Tú, Kơdră jang lơ̆m Hơnih tơm Chinh trĭ, Thường trực Ban Bí thư lui akhan: Lơ̆m jăl jang ‘nao lăng truh tơbăt 100 sơnăm pơjing Đảng Cộng sản Việt Nam, rim Khul kon pơlei choh jang sa păng tơdrong jang kon pơlei choh jang sa Việt Nam ưh kơ jor gô atŏk tơ iung kơtang, pơjing đei iŏk jơnei tih tên, tơgop jang kiơ̆ jơnei Tơdrong tơchơ̆t Hop akŏm tih ‘măng mă XIV kơ Đảng, tơ iung pơjing teh đak rơngei hiôk hian, pơm tơm kơdih, pơdrŏng, hơnŭk hơnoa, gơ̆h hơgei oei sa lơ̆ng.