Ƀok Hồ Xuân Trường rơnĕh sơnăm 1979, pơlei tơ̆ Phú Thọ, hŏk Thạc sỹ Xã hội học. Adrol đei Ban Bí thư rơih, ƀok Trường bơ̆ jang tơ̆ Anih chĕp kơ̆l Đảng găh Grŭp Anih tĕch mơdro kơ Trung ương, iŏkjang lơ kơchư̆k nhen pơm Bí thư Đoàn Grŭp, Kơdră chĕp kơ̆l Anih pơtho pơhrăm Chinh trĭ, Chánh Văn phòng, Kơdră Anih pơgơ̆r jang, Phó Bí thư Đảng Grŭp Anih tĕch mơdro kơ Trung ương.

Pơma tơ̆ hop akŏm, ƀok Phan Thăng An, Phŏ Kơdră Anih pơgơ̆r Trung ương athei ƀok Hồ Xuân Trường hơnơ̆ng hơtŏk đon rơgei đơ̆ng kơdih vă kŭm hăm Khul kơdră chĕp kơ̆l Đảng dêh char Đắk Nông mât 1 jơhngâm, gơ̆h hơgei, bơ̆ jang ‘lơ̆ng tơdrong tơchơ̆t đơ̆ng Hop akŏm Bơngai tang măt Đảng bộ dêh char Đắk Nông.