Hơiă hăm 10 ‘nu bơngai mơlôh rơgei păng 43 ‘nu bơngai mơlôh đei hơmĕng lơ̆m đĭ đăng khul linh, dơ̆ng tang ăn rơbâu ‘nu bơngai rơgei đei măt lơ̆m jơ pơm lêh pôk pơ ư, Kơdră tĕh đak Võ Văn Thưởng pơma hơdăh: iŏk đei tơdrong hưch hanh âu đĭ mơmat bơih mălei vă vei kơjăp sư ‘nŏh roi mơmat hlŏh dơ̆ng, ‘nâu gô jing tơdrong gĭt kăl lơ̆m tơdrong jang pơm linh, jĭ jơhngâm hưch hanh tôch gĭt kăl vă đe bôl boăl mơlôh hơnơ̆ng adrin, pơtâp pơhrăm, hơmet pơ ‘lơ̆ng kơdih kâu vă gơ̆h jing kăn ƀô̆, linh gơ̆h hơgei, đei jơhngâm đon ‘lơ̆ng nhen nơ̆r Ƀok Hô pơtho.

Vă hơtŏk hlŏh dơ̆ng tơdrong pran gơ̆h hơgei đơ̆ng druh dăm khul linh, Kơdră tĕh đak athei druh dăm khul linh hơnơ̆ng jang hơdoi kơjăp hăm anih jang đoan tơ̆ tơring pơm kơđông oei, bơ̆ jang ‘lơ̆ng tơdrong krao hơvơn kon pơlei, oei xa kơjăp hăm kon pơlei, vang arih xa, oei xa, bơ̆ jang hơdoi vă gơ̆h jing bơngai rơgei, đei jơhngâm đon jang tơnăp kiơ̆ tơdrong pơtho tơƀôh đơ̆ng kon pơlei, chu hŭt kơdih kâu yoa kon pơlei ‘nŏh jĭ um rup ‘lơ̆ng hlŏh đơ̆ng khul linh đei đơ̆ng kon pơlei, yoa kon pơlei khŏm tơblăh.