Đĭ hlôh 10 sơnăm bơih, mălei yă Ngô Thị Minh (55 sơnăm), tơ̆ phường Tân Lập, plt Buôn Ma Thuột oei ưh kơ ĕnh đak măt mưh chă pơđou dơ̆ng tơdrong pơ̆k rơka ƀât oei bơ̆ jang sơnăm sơ̆. Jĭ công nhân Công ty vei rơgŏh cham char Đông Phương, ƀât oei puih trong, ƀât 3 jơ pơgê, ‘nŏh 1 pôm gre tâm ƀơm yă. Gre tâm pơm ăn yă Ngô Thị Minh tŭl 2 păh jâng, jo jăn 98%: “Dang ei ‘mĕh jang 1 tơdrong kiơ kŭm athei ngôi kơpal gre drŏl ngăl, mă lei ngôi ưh kơ đunh ‘năi, lăp dang 2 jơ ‘nŏh hơmren đĭ hơkâu hloi bơih. Ƀlă đơ̆ng noh đunh đunh jĭ iung, ưh kơ kĕ chĭu yă kiơ. Dang ei, huan tơ̆ hơla kơtĕch đĭ bơih, ƀât lăp năm hơmet tơ̆ hnam pơgang đe khan pă gơ̆h hơmet kiơ bơih, pơgang pơm da ƀiơ̆ jĭ đĭ pă sĭt kiơ, inh adrin ĕnh, chô̆ văn klak, lăp adrin ĕnh jĭ kơdih lơ loh đĕch.”

Kŭm jĭ rơka truh 98% ƀât bơ̆ jang sơnăm 2004 yoa mĭn phă trong đôh, ƀok Võ Thanh Tùng tơ̆ phường Tân Tiến, plt Buôn Ma Thuột, sơ̆ jĭ công nhân pơm trong găh Anih vei lăng trong nơnăm, chơ chuĕn dêh char Dak Lak, tơroi, vă gơ̆h arih truh dang ei, ƀok hlôi yak hlŏh kơ băt dôm ‘măng răih hơmet hăm hlŏh 100 jrŭm sĭt tơ̆ kơpal kơ̆l. Ơ̆h hlŏh dơ̆ng, đơ̆ng rŏng kơ đei tơdrong jĭ 1 sơnăm, hơkăn ƀok chă jăk. Vă  chă xa rim năr, kon drŏ kăn ƀok pơih anih tĕch tơmam iĕ lơ̆m hnam thuê, kon ƀok pŭn ai hŏk đei tơdrong chă tŭr pĕt ăn kơ đe: “Mĭnh khei ‘năr đơ̆ng rŏng tĕh đak pơngơ̆t asong năm tơ̆ Hà Nội hŏk tơdrong jang chă tŭr pĕt ăn bơngai jĭ, ‘nŏh tơdrong arih xa kŭm da ƀiơ̆ pơmat tat ƀiơ̆. Dang ei oei hơdai hăm kon, hnam kơ đei, jơhngâm pran kŭm ưh jăng, mưh tŏ ‘mi kial tơplih ‘nŏh tôch kơ jĭ.”

Kiơ̆ nơ̆r tơroi đơ̆ng Anih vei lăng bơngai jang xa, linh jĭ rơka păng tơpôl dêh char Dak Lak, dang ei lơ̆m dêh char đei hlŏh 12.000 anih jang, anih tĕch mơdro oei jang xa, hăm kơsô̆ bơngai jang dang 120.000 ‘nu. Mă lơ ‘nŏh jĭ anih tĕch mơdro iĕ păng păh lăp, jang xa găh dôm tơdrong tech mơdro, pơvih pơvăn, pơm tơlĕch tơmam...

Ƀok Nguyễn Quang Thuân, Phŏ Kơdră Anih vei lăng bơngai jang xa, linh jĭ rơka păng tơpôl dêh char Dak Lak tơroi, dôm sơnăm tơjê̆ âu, tơdrong vei lăng sơđơ̆ng ‘lơ̆ng mưh bơ̆ jang tơ̆ rim anih jang đei tơrĕk roi dêh, anih, tơmam bơ̆ jang đei hơmet roi ‘lơ̆ng. Mă lei tơdrong krê pơ̆k rơka mưh oei bơ̆ jang oei đei hơnơ̆ng đĕch. Lăp jô̆ hơdrô̆ sơnăm 2022 tơ̆ dêh char đei 7 ‘măng pơ̆k rơka ƀât oei bơ̆ jang, pơm ăn 7 ‘nu bơngai lôch.

Vă găn ƀiơ̆ tơdrong pơ̆k rơka ƀât oei bơ̆ jang, Anih vei lăng kon pơlei dêh char Dak Lak hlôi tơlĕch trong jang bơ̆ jang sơđơ̆ng ‘lơ̆ng đơ̆ng sơnăm 2021-2025. Adrin truh sơnăm 2025, jô̆ păh lăp 1 sơnăm jur 4% pơ̆k rơka, lôch răm ƀât oei bơ̆ jang; hơtŏk dơ̆ng 5% kơsô̆ bơngai jang đei khăm hơmet jĭ păng 5% anih jang đei vei lăng sơđơ̆ng ‘lơ̆ng tơ̆ anih bơ̆ jang…

Ƀok Nguyễn Quang Thuân, ăn tơbăt: “Găh trong jang tôch rơđăh, mă mônh ‘nŏh hơtŏk tơdrong tơroi tơbăt, ‘ngoăih kơ tơdrong roi tơbăt hăm pano, áp phích, hla ar chih ‘nŏh athei hơtŏk tơdrong pơtâp pơhrăm ăn bơngai jang păng bơngai iŏk đe jang; Mă 2, hơlen dơ̆ng rim tơdrong hơgăt bơ̆ jang tơ̆ anih jang ƀônh đei tơdrong pơ̆k rơka, lơ̆m nŏh năng kăl truh tơdrong pơm tơlĕch tĕch mơdro, pơm tơmam, ming man athei chih tơdrong hơgăt mă rơđăh vă găn, pơm tơjur ƀiơ̆ tơdrong pơ̆k rơka ƀât oei bơ̆ jang; Tơlĕch lơ tơdrong jang păng hơmet pơ ‘lơ̆ng anih bơ̆ jang ăn bơngai jang vă vei lăng ‘lơ̆ng sơđơ̆ng hlŏh mưh bơ̆ jang.”

Rim tơdrong pơ̆k rơka ƀât oei bơ̆ jang păng tơdrong jĭ jăn đơ̆ng bơ̆ jang gơ̆h veh ver mơ̆n ră tơdăh tơ ‘ngla iŏk bơngai jang pơngơ̆t, hơmet pơ ‘lơ̆ng anih bơ̆ jang, tang găn rim tơdrong krê hơmơt păng đĭ đăng bơngai jang pơm kiơ̆ ‘lơ̆ng tơdrong hơgăt, bơ̆ jang sơ̆đơ̆ng ‘lơ̆ng. Vă jang đei tơdrong ‘nŏh, mă bơngai jang dăh mă tơ ‘ngla iŏk bơngai jang athei băt hơdăh dôm tơdrong krê hơmơt, kŭm nhen pơm thoi yơ vă pơm tơjur ƀiơ̆ tơdrong krê hơmơt kiơ̆ đơ̆ng chă hơlen năng kơdih, chih hơdăh dôm tơdrong krê, hơmơt tơ̆ anih bơ̆ jang, bơ̆ jang ‘lơ̆ng tơdrong pơtâp pơhrăm, pơtho tơƀôh, jang kiơ̆ trong vei lăng sơđơ̆ng ‘lơ̆ng ƀât oei bơ̆ jang.