'Nâu jing dêh char mă 31 kơ jâ̆p teh đak păng jing dêh char mă blŭng kơ tơring Tây Nguyên keh đang hô sơ vă xơkơ̆t pơkăp kơ dêh char. Pơkăp dêh char Đăk Nông tơbang 7 tơdrong hơtŏk tơ-iung, tơchơ̆t truh xơnăm 2030 pơjing dêh char Đăk Nông jing tơring đei mŭk drăm hơbĕch hơbal păng kơjăp xơđơ̆ng kơ tơring Tây Nguyên, jing anih tơm kŏng ngĭp bôxít - nhôm kơ teh đak, anih tơm pơm tơlĕch unh hơyuh 'lơ̆ng kơ tơring Tây Nguyên; Hơtŏk tơmang pơhiơ̆ pơdơh pơdơi, cham char kiơ̆ tơdrong hiôk găh hơyuh 'năr, um ai; Hơtŏk choh jang xa kiơ̆ trong 'nao, kơjăp xơđơ̆ng. Xơkơ̆t truh xơnăm 2050, adrin 'nhăk Đăk Nông jing dêh char hơtŏk tơ-iung kơ tơring Tây Nguyên, đei iŏk yua hăm rim kon pơlei jang xa kơjung hloh kơ pơkăp atŭm kơ jâ̆p teh đak. Đăk Nông xơkơ̆t pơjing 3 tơdrong kăl lơ̆m hơtŏk tơ-iung găh: Anih jang kŏng ngĭp bôxít - nhôm – pai mam păng kŏng ngĭp pơm tơlĕch unh hơyuh 'lơ̆ng; Choh jang xa kơjăp xơđơ̆ng pơtrŏ hăm hơyuh tô̆ 'mi tơplih tơguăt hăm tơring tĕch răt; Tơmang pơhiơ̆ cham char, pơdơh pơdơi tơguăt hăm plenh teh, pơlei pơla păng cham hơgơp tơmo đei pơkăp đơ̆ng UNESCO. Dêh char hơtŏk  11 tơring kơdrâ̆m lơ̆m 3 tơring tơm, 4 anih jang mŭk drăm kiơ̆ jăl trong 14, 14C, jăl trong 28 păng dôm jăl trong Hlĕch – Pơmơ̆t. Đăk Nông adoi tơlĕch 14 trong jang hơdăh vă hơvơn jơhngơ̆m jang pơm kiơ̆ pơkăp tơlĕch.