Sơnăm au, dêh char Đak Lăk đei hloh 20.000 ‘nu hŏk tro chih hơnăm vang pơlong tơ̆ 15 apŭng, pơlei tơm lơ̆m dêh char. Vă ‘măng pơlong Jăl pêng sơnăm 2023 iŏk đei hơ iă hloh, Hơnih vei lăng Hnam trương pơtho pơhrăm dêh char Đak Lăk tŏk bŏk hơmet pơ ‘lơ̆ng rim tơdrong ăn ‘măng pơlong. Lơ̆m au hơmet pơ ‘lơ̆ng tơdrong hŏk pơhrăm, hơlen lăng tơdrong hŏk pơhrăm kơ đe hŏk tro vă chă pơtho ming ăn dơ̆ng. Ƀok Phạm Đăng Khoa, Kơdră chĕp pơgơ̆r Hơnih vei lăng Hnam trương pơtho pơhrăm dêh char Đak Lăk tơbăt: Truh dang ei, bơ̆ jang hơmet ăn ‘măng pơlong Jăl pêng sơnăm 2023 tŏk bŏk tơlĕch ƀlep pơkăp. ‘Ngoăih tơdrong dăr lăng, lăng hơlen hơnih tơmam drăm kiơ̆ nơ̆r athei đơ̆ng Hơnih tơm vei lăng Hnam trương pơtho pơhrăm, pơtho ming ăn kang ƀô̆ bơ̆ jang lăng pơlong. Rim hnam trương đei hŏk tro vang pơlong lĕch ‘măng khoă tŏk bŏk chă pơtho ming, pơgơ̆r hơlen tơdrong hlôh vao kiơ̆ tơdrong pơlong mă Hơnih tơm vei lăng Hnam trương pơtho pơhrăm tơlĕch vă chă pơtho ming ăn hŏk tro mă trŏ ƀlep. “Lăng truh dôm hŏk tro ưh kơ gan gơ̆h vă chă pơtho ming ăn đe oh păng rim hnam trương hlôi pơjao ăn rim ƀok thây kô hơgei chă pơtho ming ăn dôm hŏk tro au vă đe oh hlôi vao păng lui tơ̆ hơnăp vang năm pơlong kơ ‘măng pơlong au”.

Kiơ̆ tơdrong tơchơ̆t đơ̆ng Hơnih tơm vei lăng Hnam trương pơtho pơhrăm, đơ̆ng năr 4/5, hŏk tro lơ̆m teh đak chih hơnăn vang năm pơlong ‘Măng pơlong lĕch ‘măng pơlong Jăl pêng sơnăm 2023. Khei ‘năr chih hơnăm vang pơlong truh 5 jơ kơsơ̆ năr 13/5. Hŏk tro tŏk bŏk hok lăm 12 tơ̆ rim hnam trương jăl pêng, hnam trương pơtho tơdrong jang-giáo dục thường xuyên chih hơnăn vang năm pơlong kiơ̆ trư̆k tuyên, găh dôm hŏk tro apĭnh pơlong dơ̆ng ‘nŏh năm chih hơnăn kơtă hloi.

Saroi vă jê̆ truh jơ ‘năr pơgơ̆r ‘măng pơlong Jăl pêng sơnăm 2023, oh Phạm Chính Tuyến, hŏk tro lăm 12, Hnam trương Jăl pêng Lương Thế Vinh, Hà Nội sa roi kơrŭn jơhngơ̆m, kơ yuơ ‘nau đei lăng jing ‘măng pơlong gĭt kăl hloh tơ̆ hơnăp kơ tơdrong chă rơih tơdrong jang đơ̆ng rŏng au kơnh. “Jei vă jê̆ truh jơ ‘năr pơlong bơih oei đei lơ trong vă mơ̆t hŏk đăi hŏk. Nhôn jei tơnap mă chă rơih. Lơ̆m giĕng ‘nŏh ĭnh ‘măn 4 jơ ‘năr vă năm hŏk dơ̆ng tơ̆ gơmăng, găh dôm jơ ‘năr ưh kơ đei hŏk pơhrăm dơ̆ng ‘nŏh ĭnh chă pơm kơdih dôm 1 ƀai toan, 1 ƀai nơ̆r Anh đơ̆ng noh kơ dih ba chă hơmet ming. Găh Văn tơdăh oei đei jơ ‘năr lei ĭnh jei chă đŏk hơlen vă hlôh vao dôm ƀai pơlong”.

Tŏ đon mưh kơrŭn đĭ jơhngơ̆m hơmet ăn ‘măng pơlong ‘nŏh jing hơhngơ̆m đon lei lăi dih băl kơ lơ hŏk tro lơ̆m jơ ‘năr lăp pă 1 khei dơ̆ng ‘nŏh jĭ truh jơ ‘năr pơlong. ‘Nau jing jơ ‘năr gĭt kălhloh vă đe oh hŏk pơhrăm ming rim tơdrong hŏk pơhrăm lơ̆m ‘măng pơlong lĕch ‘măng khoă. Găh păh hnam trương vă tơdrong chă pơtho ming ăn đe hŏk tro đei jơnei, atŭm hăm tơdrong pơtho ming dơ̆ng rim ƀai hlôi đei hŏk pơhrăm, pơtho ming dôm tơdrong kăl ăn hŏk tro, ƀok thây kô pơtho oei ăn hŏk tro chă pơm dơ̆ng dôm ƀai đei pơlong lơ̆m dôm sơnăm hơdrol au ki. Kô pơtho Vũ Thị Minh Trang, kô pơtho môn Ngữ văn, Hnam trương Alfred Nobel tơbăt:“ ‘Ngoăih jơ hŏk tơ̆ lăm ‘nŏh rim đe oh jei đei rim jơ hŏk ming dơ̆ng păng jei tôch pơnam chă hŏk pơhrăm rim ƀai mă rim ƀok thây kô pơtho pơjao ăn păng vang chă hŏk pơhrăm hăm rim ƀok thây kô chă pơtho tơ̆ lăm hŏk”.

Mă đơ̆ng lơ̆m jơ ‘năr hŏk pơhrăm ming pă đei đunh, mă lei rim ƀok thây kô jei chă pơtho khan ăn hŏk tro ‘nĕ chă tơtăm, chă tŏ đon, hơdrin vei lăng năng tông jơhngơ̆m pran jăng grăng akau, hơdrin hŏk pơhrăm rim môn pơlong ‘nŏh. Tiến sỹ Huỳnh Văn Chương, Kơdră Hơnih vei lăng Tơdrong pơtho pơhrăm hơgei kơ Hơnih tơm vei lăng Hnam trương pơtho pơhrăm pơkă:“Hrei au ‘nŏh đe oh tŏk bŏk akŏm lơ lơ̆m hok pơhrăm ming dôm ƀai vă pơlong ‘nŏh păh Hơnih tơm vei lăng Hnam trương pơtho pơhrăm păng mă kăl Hơnih vei lăng tơdrong pơtho, hŏk hơgei ‘nŏh nhôn chă pơkă ăn rim đe oh ‘nĕ chă tăr văr, chơ̆n jơhngơ̆m păng hŏk pơhrăm ming mă hơlen rim tơdrong, hŏk kiơ̆ rim ƀai đei pơlong lơ̆m dôm sơnăm hơdrol, mă kăl nhôn ‘nao tơbăt hơdăh kơ sơnăm 2023. Rim đe oh hơdrin chă hŏk pơhrăm dôm tơdrong đei pơlong hơdrol, pơm kiơ̆ mă hơlen ‘nĕi hơmŏ iŏk đei jơnei, đei điêm lơ vă gơ̆h đei tơchơ̆t lĕch ‘măng khoă adoi gơ̆h chă xek tơmơ̆t hŏk đăi hŏk păng rim tơdrong rơvơn anai”.

Hơnih tơm vei lăng hnam trương pơtho pơhrăm hlôi hơmet đang kmăi kmŏk phân mêm, hơnih kmăi kmŏk pơre nơ̆r kơtơ̆ng ang ăn tơdrong chih hơnăn vang pơlong. Hơnih tơm vei lăng Hnam trương pơtho pơhrăm jei đei khul bơ̆ jang prăt măng prăt năr vă tơgŭm djru hơmet ming dôm tơdrong tim mă trŏ lăp tơdăh đei. ‘Măng pơlong Jăl pêng sơnăm 2023 gô đei pơgơ̆r đơ̆ng năr 27 truh năr 30/6. Dôm điêm pơlong gô đei tơbăt hơdăh lơ̆m năr 18/7.