Ƀlep ƀơ̆t tơbăt 77 sơnăm Năr Hơp tak xăh Việt Nam (11/04), pơ gê ‘năr 6/4, Khŭl jang kơtơ̆ng ang, Anih Radio nơ̆r pơma Việt Nam jang hơdai hăm Jơnŭm Hơp tak xăh Việt Nam pơgơ̆r pơma đam “Hơtŏk tơiung mŭk drăm tơpôl, hơp tak xăh lơ̆m jăl jang ‘nao”. Kơdră Anih tơm vei lăng găh choh jang sa păng hơtŏk tơiung tơring tơrang Lê Minh Hoan truh akŏm păng iung pơ ma tơ̆ jơ pơma đam. Tơdrong jang klăih song pơm 2 ‘măng đei hơnăn: “Hlôh vao ƀlep vă đei trong jang tơgŭm lăp hăm anih jang mŭk drăm tơpôl” păng “Hơmet ming Luơ̆t Hơp tak xăh 2012 - Tơdrong ‘lơ̆ng ‘nao ăn mŭk drăm tơpôl”.

Tơ̆ pơma đam, dôm bơngai tang măt akŏm pơm rơđăh hloh hơnăp jang đơ̆ng mŭk drăm tơpôl, lơ̆m noh tơm ‘noh jĭ hơp tak xăh; tơdrong kăl hloh athei jăh chih pơ keh hla ar trong jang, tơdrong khôi luơ̆t, tơm ‘noh jĭ hơmet ming Luơ̆t Hơp tak xăh vă pơtrŭt mŭk drăm tơpôl păng hơp tak xăh pran kơjăp; dôm ƀai hŏk hơtŏk tơiung mŭk drăm tơpôl păng hơp tak xăh lơ̆m apŭng plĕnh teh păng tơ̆ Việt Nam.