
Lêh chao kơ tơ̆ achon Hòn Khoai, apŭng Ngọc Hiển, dêh char Cà Mau, hơtăih kơ groi teh tơ̆ kông dang 14km. Tơring âu jĭ anih mă blŭng mưh đơ̆ng đak dơsĭ biển Đông mât tơ̆ tơring đak dơsĭ Tây Nam Bộ, đei pơtih jĭ 1 anih gak tơ̆ jih đak dơsĭ, tơ̆ jih rơvơ̆ng plenh kơtơring đak dơsĭ găh Pơnât Pơbăh kơ teh đak. Đei năng hla kơ păr pơ liơk tơ̆ tŏn bŏk đak dơsĭ, đei hơri ƀai quốc ca lơ bơngai ưh kơ kĕ ôn jơhngâm đon hưch hanh mưh ‘măng mă blŭng đei chao kơ tơ̆ bŏk bŏk achon kông đak dơsĭ: “Mưh đei dơ̆ng hơdai hăm đe linh tơ̆ achon kông, vang chao kơ ‘nŏh jĭ 1 tơdrong tôch hơiă hăm kơdih kâu inh.”

Hăm hlŏh 150 tŏ achon kông tih iĕ, đei tơ̆ jơ̆p tơring đak dơsĭ găh Pơmât Pơbăh, tơring đei bơngai arih xa, tơring lăp đei hơdrô̆ ƀô đô̆i. 1,2 achon kông tĕh kông kơjung, kông tơmo, nơnăm tôch pơmat tat. Mă lei yak hlŏh rim tơdrong pơmat tat, đe linh đơ̆ng khul linh rada, ƀô đôi vei lăng tơring sơlam… hơnơ̆ng chep kơjăp phao, prăt măng prăt năr gak vei lăng rơvơ̆ng plenh, tơring đak dơsĭ, hơlen năng rim tơdrong ƀơnm truh tơ̆ ƀato păng rơvơ̆ng plenh vă roi tơbăt tơtom ăn ƀok yŏng; jĭ anih gơnang tôch kơjăp ăn kon pơlei mưh ưh pŭn đei tơdrong jĭ jăn dăh mă đei tơdrong sar bar ƀât oei rôp yâu ka hơdang.
Đại úy Nguyễn Tuấn Anh, Yŏng linh vei lăng rađa 625 trung đoàn 551 Anih chĕp kơ̆l Khul linh tơring 5 găh khul linh đak dơsĭ ăn tơbăt: “Hnam kơmăy tơlĕch jang ‘lơ̆ng tơdrong kơchăng tơblăh, dăr hơlen, roi tơbăt rim tơdrong lơ̆m tơring vei lăng, pơgơ̆r trư̆k kơjăp ‘lơ̆ng, kăl loi athei kơchăng tơblăh, tơtom roi tơbăt rim tơdrong tơ̆ đak dơsĭ, kơpal rơvơ̆ng plenh ăn Anih chĕp kơl pơgơ̆r, vang tơgop vei lăng kơjăp ‘lơ̆ng tơring đak dơsĭ đei pơjao.”

Đei tơdrong pơngơ̆t đơ̆ng Đảng, teh đak, tơdrong vang jang đơ̆ng kon pơlei, dôm achon kông tơ̆ găh Pơmât Pơbăh dang ei oei tơplih ‘nao rim năr, anih jang, trong nơnăm, hnam pơgang, sơlŭng mong đak ƀlăng, unh điên, hnam trưng mâm non truh hnam hŏk jăl 2 đei man kơjăp ‘lơ̆ng, tơgŭm ăn kon pơlei hiôk hian ƀiơ̆ lơ̆m tơdrong arih xa păng jang mŭk drăm. Đei teh đak păng anih mong jên asong tŏk iŏk jên hăm jên kon tŏ sĕt, kơna dang ei hơdai hăm tơdrong rôp yâu ka, lơ kon pơlei tơ̆ âu oei pơ̆n tơlĕch jên rong ka lơ̆m hơdrao hơdai hăm atŏk tơiung chă tơmang lăng kơna tơdrong arih xa roi đunh roi tŏk ƀiơ̆: “Inh ƀôh tơdrong rong ka hơdang đei lơ tơdrong ‘lơ̆ng. Tơ̆ âu đei tơdrong ‘lơ̆ng ‘nŏh jĭ anih ving kơna ưh đei kial hơbŭt, đak rơgŏh kơna dôm kơloăi ka hơdang ƀônh tih, ‘lơng. Sơnăm 2024 tĕch đei 10 tân ka hơdang, trư tôm jên jang oei rơkăh 2,3 triu hlak jên.”

Jơhngâm đon čhôk ‘nă kơ pơyan Puih mak nhen truh hrôih ƀiơ̆ tơ̆ dôm achon kông tơ̆ đak dơsĭ hăm lơ ƀai hơri hơxoang, tơmam Têt đei hơdrô̆ đơ̆ng dôm tơring mă khul jang hơpăh ăn đe linh păng kon pơlei tơ̆ achon kông; păng mă loi jĭ tơdrong ưh kơ đei thĭu jĭ pơm ƀĕng chưng, pơm têt tơ̆ achon kông. Ƀĕng chưng tơ̆ âu kŭm đei phe tơyông, găr tơh, ‘nhĕm nhŭng mă lei pơm hăm hla prit, không ƀĕnh đei đe linh pơm hăm hla gao.
Kiơ̆ đơ̆ng ‘măng yak mă âu, rim bơngai lơ̆m khul hlôh vao ƀiơ̆ găh tơdrong arih xa, mŭk drăm, tơpôl, tơdrong hŏk pơhrăm, bơ̆ jang păng jơhngâm đon hưch hanh vă sơng xa têt đơ̆ng đei kăn ƀô̆, linh păng kon pơlei tơ̆ tơring găh đak dơsĭ găh Pơmât Pơbăh, băt hơdăh ƀiơ̆ dôm tơdrong tơgop, plang pơyơ̆r jơhngâm đon đơ̆ng đe linh đak dơsĭ; găh tơdrong nuih kơtang đơ̆ng kon pơlei tơ̆ achon kông tơ̆ hơnăp kơ đak pŏh yă, kial tak, vă vei lăng kơjăp tơdrong pơm tơm tơ̆ đak dơsĭ hai, vă atŏk tơiung mŭk drăm vang pơjing dôm achon kông tơ̆ đak dơsĭ jing achon kông jơk ƀlĭk, pơdrŏng đei ƀôh tơ̆ tŏk bŏk đak dơsĭ kơ teh đak.
Viết bình luận