Tŏk bŏk lơ̆m pơyan ‘mi, Thiếu tá Nguyễn Phúc Thuận (Kơđông Ƀô̆ đô̆i vei lăng sơlam teh đak Dak Lao) chă pơtho tôch hơlen ăn kon pơlei oei lơ̆m pơlei Dak Thŏ, tơring Dak Lao, apŭng Dak Mil, dêh char Dak Nông kih thuơ̆t vei lăng chehphe. Đơ̆ng mă đei pơjao vang hop akŏm atŭm hăm chi ƀô̆ pơlei Dak Thŏ, ‘nhŏng ling lang yak hơdoi hăm kon pơlei lơ̆m choh jang sa, pơm lơ liơ roi năr roi pơm hơtŏk tơdrong hơrih sa sơđơ̆ng ăn kon pơlei tơ̆ tơring sơlam teh đak.“Vă đei hơdrĕch ‘long pơtăm, yŏng kon tơrong trŏ lăp, ‘noh ba hlôi hơlen, iung jang hăm khul choh jang sa tơring, apŭng chă tơchĕng hơlen dôm hơdrĕch ‘long trŏ lăp vă pơtho khan ăn kon pơlei răt pơtăm. Ăn sinh viên năm pơma dơnuh hăm kon pơlei găh dôm trong jang trŏ lăp vă kon pơlei jang kiơ̆. Ba jei chă apĭnh athei ăn rim kang ƀô̆ jur năm tơ̆ tơring, năm tơ̆ pơlei pơla vă tơgŭm djru ăn dôm ŭnh hnam tơnap tap”.

Ƀok Nguyễn Khắc Chinh, Ƀĭ thư Chi ƀô̆ pơlei Đak Thŏ, tơring sơlam teh đak Dak Lao, apŭng Dak Mil, dêh char Dak Nông tơbăt, đơ̆ng năr Thiếu tá Nguyễn Phúc Thuận đei pơjao vang hop akŏm lơ̆m chi ƀô̆, rim ‘măng hop akŏm chi ƀô̆ pơlei đei pơma dơnuh dih băl jrŭ hloh dơ̆ng. Dôm tơdrong tơchơ̆t trŏ lăp hăm tơdrong hơrih sa, jang sa đei chi ƀô̆ tơlĕch păng jang kiơ̆. Rim đảng viên jei băt hlôh ƀôh hơdăh hơnăp jang kơdih ‘noh pơm jŭk yuk trong hơlou, hơdrin jang sa, tơplih ‘long pơtăm, kon tơrong. Thiếu tá Thuận atŭm hăm chi ƀô̆ pơlei hlôi pơrô̆ hơvơn, tơgop ming man đei 4 pơbŭng hnam ‘mêm mơnat. “Ma Thuận ‘noh kang ƀô̆ sơnăm mơlôh, tơnăp, hơbĕch hơbal lơ̆m rim tơdrong jang. Chă pơtho khan ăn chi ƀô̆ adoi nhen kon pơlei lơ̆m pơlei găh tơdrong choh jang sa, pơm kiơ̆ ‘lơ̆ng vei lăng năng tông sơlam teh đak. Kăl lui yom păng ‘mêm kơ eng tơpă mơ̆n”.

Hơngŭr “pêng tơklep, puăn hơdoi” vă “ ‘Mi pru ju kơtang”, dôm đảng viên ƀô̆ đô̆i vei lăng sơlam teh đak đei pơjao vang hop akom atŭm hăm rim chi ƀô̆ pơlei lơ̆m tơring sơlam teh đak Dak Nông hlôi tơgŭm ăn kon pơlei tơplih jơhngơ̆m đon tơchĕng trong jang sa, pơjing đei tơdrong hơrih sa sơđơ̆ng ‘lơ̆ng rŏ. Yă H’Xuân, Kơ iĕng Kơdră chĕp pơgơ̆r Đảng apŭng Dak Mil, dêh char Dak Nông tơbăt.“Hăm khul Ƀô̆ đô̆i vei lăng sơlam teh đak lơ̆m apŭng ‘noh jei pơjing đei trong jang ‘lơ̆ng hơ iă. Dôm tơdrong jang ‘noh hlôi đei lang să păng kon pơlei oei lơ̆m apŭng hôn bơnê kơtang. Tơgop lơ̆m bơ̆ jang tơ iung pơjing pơlei pơla Dak Mil, mă kăl ‘noh jang kiơ̆ rim tơdrong Tơchơ̆t đơ̆ng Đảng găh atŏk tơ iung mŭk drăm tơpôl păng tơ iung pơjing sơđơ̆ng dơ̆ng kơjăp, vei lăng sơđơ̆ng tơring sơlam teh đak lơ̆m apŭng.”

Hăm tơdrong tơgŭm djru đơ̆ng rim ƀô̆ đô̆i kơlong jơk, tơdrong hơrih sa kơ kon pơlei oei tơ̆ tơring sơlam teh đak dêh char Dak Nông roi năr roi sơđơ̆ng. Jei đơ̆ng mă noh, kon pơlei hlôi băt hlôh ƀôh hơdăh găh tơdrong kăl kơ vei lăng năng tông pơm tơm kơdih, vei lăng sơđơ̆ng tơring sơlam kơ teh đak. ‘Nhŏng Y Quyết, hơdrung M’nông oei tơ̆ pơlei Sapa, tơring Thuận An, apŭng Dak Mil, jang chehphe tơ̆ tơring sơlam Thuận Hạnh, pơma:“Ŭnh hnam nhôn đei mir tơ̆ ou, păng đei hơdrơ̆ng sơlam teh đak lơ̆m mir hloi. Rim ‘măng năm jang ‘noh ba jei chă choong choh pơ-‘ngoăih bơ̆t tăp dăr hơdrơ̆ng sơlam ou. Păng tơdăh ƀôh tơmoi chă yak tơ̆ tơring sơlam teh đak ‘noh nhôn tơroi tơbăt hloi kơ ƀô̆ đô̆i vei lăng sơlam teh đak. Ƀô̆ đô̆i vei lăng sơlam teh đak năm pơtrui hơnơ̆ng kơna nhôn jei sơđơ̆ng jơhngơ̆m jang mir tơ̆ ou.”

Kiơ̆ đơ̆ng Trung tá Lương Đình Hùng, Chính trị viên Kơđông ƀô̆ đô̆i vei lăng sơlam teh đak Dak Song, dêh char Dak Nông, xơkơ̆t hơdăh vei lăng năng tông kơjăp tơring sơlam teh đak ‘noh ưh khan lăp tơdrong jang kơ Ƀô̆ đô̆i vei lăng sơlam teh đak mă oei jing hơnăp jang kơ đĭ đăng kon pơlei, kăl gơnang lơ̆m jơhngơ̆m pran kơ kon pơlei. Kơđông hơnơ̆ng jang ‘lơ̆ng bơ̆ jang vei lăng năng tông tơdrong hơrih sa, jang sa tơpôl, “oei sa hơdoi, jang sa hơdoi” hăm kon pơlei lơ̆m tơring sơlam teh đak. “Kơđông gơnang lơ̆m kon pơlei, kon pơlei ‘noh bơngai tơ-‘ngla vei lăng năng tông sơlam teh đak, ƀô̆ đô̆i vei lăng sơlam teh đak ‘noh khul jang tơm iŏk jang vei lăng. Rim sơnăm, hơnih iung jang hơdoi hăm khul kơdră tơring pơgơ̆r lơ tơdrong joh ayŏ kơdŏ soang, đă ƀŏng lŏng tơplŏng kơdou, păng hop akŏm pơtôch 1 sơnăm jang kiơ̆ tơdrong jang đĭ đăng kon pơlei vang vei lăng sơlam teh đak, vă atŭm hăm kon pơlei jang kiơ̆ ‘lơ̆ng tơdrong jang vei lăng năng tông sơlam teh đak lơ̆m tơring.”  

Dôm sơnăm ou ki, Ƀô̆ đô̆i vei lăng sơlam teh đak Dak Nông hlôi ăn 57 ‘nu đảng viên vang năm hop akŏm hơdoi hăm 55 chi ƀô̆ pơlei; pơjao 146 đảng viên iŏk chĕp pơgơ̆r rim khul ŭnh hnam oei tơ̆ tơring sơlam teh đak. Hăm dôm trong jang ‘lơ̆ng hơ iă păng jơnei hlôi tơgop pơm hơtŏk tơdrong hơrih sa kơ kon pơlei rim hơdrung, pơm hơtŏk loi dơ̆ng tơgoăt tơgoăl dih băl kơjăp ƀô̆ đô̆i kon pơlei lơ̆m tơring sơlam teh đak. ‘Noh jing tơdrong kơnăl vă ƀô̆ đô̆i vei lăng sơlam teh đak Dak Nông tơ iung pơjing vei lăng sơlam teh đak gơnang lơ̆m kon pơlei, vei lăng sơlam teh đak sơđơ̆ng dơ̆ng kơjăp păng roi năr roi atŏk tơ iung.