Kơdră Quốc hội Trần Thanh Mẫn roi tơbăt, ‘măng hop akŏm gô pơgơ̆r pơih blŭng ‘năr 20/10 păng tơchĕng hơdrol pơtôch 12/12. Tơchĕng hơdrol, Quốc hội set hơlen, tơchơ̆t 45 luơ̆t, tơchơ̆t găh tơdrong jang pơjing khôi luơ̆t; 13 grŭp tơdrong ƀơm truh mŭk drăm - tơpôl, jên jang teh đak, dăr hơlen păng dôm tơdrong gĭt kăl nai; hơdai hăm ‘noh, rim anih jang kŭm gơih 13 grŭp hla ar roi tơbăt vă bơngai tang măt tơchĕng hơlen.

Mă lei, truh dang ei ‘nao đei 16/45 tơdrong pơjing khôi luơ̆t đei Anih chĕp kơ̆l pơgơ̆r Quốc hội ăn tơgop nơ̆r. Kơdră Quốc hội athei rim Kơdră tơm, Kơdră Jơnŭm vei lăng Hơdrĕch kon kông păng dôm Kơdră vei lăng Anih jang kiơ̆ truh tôch tơdrong jang chih hơmet, pơtruh păng hơlen lăng dôm tơdrong jang luơ̆t vă vei sơđơ̆ng ‘lơ̆ng, tơtom, tơgop hơtŏk ‘lơ̆ng đei yua tơdrong jang pơjing khôi luơ̆t.