Lơ̆m 2 năr 1 puăt bơ̆ jang mă hơtuch kơ Hop akŏm, Quốc hội vă drơ̆ng nơ̆r ăn lơ kơluơ̆t, Tơdrong tơchơ̆t gĭt kăl pơvih ăn tơdrong hơmet ming, kăt tơjur bơngai jang păng tưk tơiung tơdrong jang mŭk drăm, tơpôl. Jơ pơtôch hop akŏm vă pơgơ̆r til pơgê năr 3, ‘năr 19/2.

Pơma tơ̆ grŭp, pơgê 15/2, Tổng Bí thư Tô Lâm pơma hơdăh: tơdrong tơlĕch Hla ar tơchơ̆t jang pơlong năng 1,2 tơdrong tơgŭm vă hơmet pơ ‘lơ̆ng tơhlăk tăk mư̆h jang khoa hŏk, kơmăy kơmŏk păng tơplih ‘nao rơgei ‘nŏh tôch gĭt kăl, vă hơmet pơ ‘lơ̆ng pơmat tat, tơtom hơmet ming dôm tơdrong tơhlăk păng pơlung tưk tơiung tơdrong jang khoa hŏk, kơmăy kơmŏk păng tơplih ‘nao rơgei.

Thủ tướng Phạm Minh Chính ‘nŏh pơam hơdăh, ‘mĕh jang tŏk hrĕnh, pran kơjăp ‘nŏh ‘moi kiơ̆ Khoa hŏk kơmăy kơmŏk, tơplih ‘nao rơgei, tơplih hăm kơmăy sô̆ ‘nŏh jĭ tơdrong athei jang nă ‘lơ̆ng. Yoa thoi noh athei hơmet pơ ‘lơ̆ng trong chĕp kơ̆l pơgơ̆r, trong bơ̆ jang tơ̆ hơnăp dang ei hăm 1,2 tơdrong pơmat tat, tơhlăk tăk vă tơdrong tơchơ̆t 57 gơ̆h tơmât lơ̆m tơdrong arih xa hloi.