Pơgê 21/8, Anih vei lăng jŏh ayŏ kơ dŏ xoang, tơpôl kơ Quốc hội jang hơdoi hăm dôm anih jang đei ƀơm truh pơgơ̆r jơ hôp tơl tơblang dôm tơdrong jang kiơ̆ khôi luơ̆t mưh tang găn pơgang ya, tơmam xa ya. Hla ar chih tơroi ăn ƀôh, tơdrong pơgang ya, ưh kơ ‘lơ̆ng păng tơmam xa ya oei đei tôch dêh, pơjoă truh jơhngâm pran, tơdrong arih kơ kon pơlei păng bưng ai anih jang pơgang.

Đơ̆ng blŭng sơnăm 2024 truh dang ei, khul vei lăng tơdrong tĕch mơdro sek tơlang hlŏh 11.600 tơdrong glăi, phak loi 76 ti hlak jên; hơdrô̆ pơgang, tơmam xa nhen pơgang đei 345 tơdrong, phak hlŏh 29 ti, tơmam glăi thu đei kơjă hlŏh 14 ti. Kơdră tơm vei lăng jang pơgang Đào Hồng Lan pơma hơdăh, pơgang ya păng tơmam xa ya jĭ tơdrong tih, athei bơ̆ jang hrơ̆ch ‘lơ̆ng, đơ̆ng rim anih jang chinh trĭ. Khei ‘năr âu ki, Khul kơdră teh đak, dôm anih tơm, anih jang kơpal păng tơring tơrang tơlĕch lơ trong jang, mă lei oei đei lơ tơdrong tam mă ‘lơ̆ng găh khôi luơ̆t păng trong pơgơ̆r jang.