Jĭ hơnih kơdrơ̆m tơm kơ dêh char Dak Lăk mă lei lơ̆m pơlei tơm Buôn Ma Thuột, kơsô̆ gre kŏng nŏng chă kơdou rok trong oei đei truh rơbou tong, mă kăl tơ̆ rim tơring tơter. Ƀok Y Thơm Kênh, thôn 1, tơring Cư Êbur , pơlei tơm Buôn Ma Thuột tơbăt, mă đơ̆ng kơdih đei rơvơn răt đei mĭnh tong gre bán tải, mălei ƀok oei iŏk yoa gre kŏng nŏng kơ yuơ gre ou gơ̆h jang tôm tơdrong. 'Ngoăih chơ tơmam drăm, gre ou oei gơ̆h chă choh teh mir kông păng chŭn na mưh đei chă pơlăp ‘long choh. Ƀok Y Thơm jei ƀôh hơdăh gre kŏng nŏng kơ loăi so ưh sơđơ̆ng tơpă mơ̆n, kơna hơdrol kơ vă răt gre ‘nao, ƀok hlôi mơ̆ng kiơ̆ nơ̆r pơtho khan đơ̆ng khul kŏng ang tơring, tơmơ̆t jên răt vă jê̆ hloh 1 poăt kon jên vă gre kơjăp ‘lơ̆ng sơđơ̆ng hloh dơ̆ng:“Mưh ba pơm gre ou ‘noh kŏng ang pơtho tơbăt tôm bơih, kăl chă pơkăp ŭnh kơđeng xinhan găh ‘ma, găh ‘ngiĕo, pơlăp klel. Pơđĭ kon jên chă pơm gre ou truh 125 triu hlak jên. Păng gre ou ưh kơ ngê̆ kơ koai, ba pơlăp kmăi đê”.

Tơpă yan ou tơ̆ tơring Cư Êbur, dêh char Dak Lăk jei nhen rim tơring kơ rim dêh char Tây Nguyên, hui kơ đei gre kŏng nŏng đei tôm ŭnh ƀin, klel, xinhan. Lơ̆m kơ hrĕng rơbou tong gre ou, lăp tŏ sĕt gre chơ bơngai, chơ choen tơmam drăm choh jang sa, tơmam ming man ...bơngai tơ-‘ngla lăng tông truh tơdrong sơđơ̆ng. Pă dôm yơ chă kơdou kiơ̆ pơyan, dôm ŭnh tơ̆k hơdăh, klel hư răm đĭ đăng, tôch kơ hơmơt, sơnăm ayơ jei đei sar bar trong nơnăm pơm ăn bơngai lôch. Găh lơ ‘măng sar bar trong nơnăm đei ƀơm truh gre kŏng nŏng lơ̆m gơmăng ngăl. Vă pơm dă ƀiơ̆ sar bar trong nơnăm, đơ̆ng blŭng sơnăm 2024, kanh sat vei lăng trong nơnăm păng kŏng ang tơring tơ̆ 2 dêh char Dak Lăk, Dak Nông hlôi iung jang lơ ‘măng pơklep decal rang ăn gre kŏng nŏng lơ̆m tơring, hơvơn đei lơ tơ-‘ngla gre năm pơklep. Kiơ̆ đơ̆ng Đại úy Bùi Mạnh Tuấn, Kơ iĕng Kơdră chĕp pơgơ̆r Kŏng ang tơring Cư Êbur, pơlei tơm Buôn ma Thuột, dêh char Dak Lăk, pơklep decal rang ưh khan trong vă pơm sơđơ̆ng mă oei jing trong iung jang pơrô̆ pơrôp pơtho tơbăt tôm tong găh sơđơ̆ng trong nơnăm hăm gre kŏng nŏng:"Tơdrong pơlep decal ou ‘noh mĭnh păh vă tơƀơ̆p pơma dơnuh hăm kon pơlei. Đơ̆ng tơdrong pơklep decal ou vă pơtho khan, krao hơvơn kon pơlei chă răt pơlăp ŭnh gre, klel ... pơm hơtok sơđơ̆ng trong nơnăm mưh chă kơdou tơ̆ trong gre ou to ‘noh sơđơ̆ng hloh. Tơdrong mă ou iung jang dar deh, iung jang hơnơ̆ng, vă pơm dă ƀiơ̆ đei tơdrong sar bar trong gre nơnăm”.

Tơ̆ 5 dêh char Tây Nguyên hrei ou đei dang 200.000 tong gre kŏng nong. Tơdrong pơklep decal rang ăn kơ loăi gre ou đei iung jang đơ̆ng sơnăm 2019, tơ̆ mĭnh ƀar tơring. Đơ̆ng blŭng sơnăm truh dang ei, trong jang ou đei tơlĕch jang jơ̆p jang, atŭm hăm tơdrong jang chă pơrô̆ pơtho tơbăt rim tơdrong tơchơ̆t mưh vơ̆r gre yak tơ̆ trong, mă kăl tơdrong ưh kơdou rĕnh hloh tơdrong pơkăp, ưh kơ chơ bơngai; pơm kiơ̆ veh kơ gre, ploi gre anai, veh tơ̆ păh trong ƀlep tơdrong pơkăp … Thượng tá Phạm Quốc Lập - Kơdră chĕp pơgơ̆r Hơnih Kanh sat vei lăng trong gre nơnăm kơ Kŏng ang dêh char Dak Nông akhan, lơ̆m tơdrong tơpă yan ou tơ̆ dêh char, ‘nou jĭ trong jang ‘lơ̆ng hơ iă hloh:"Pơklep decal rang ăn gre kŏng nŏng vă dôm bơngai vơ̆r gre yak đơ̆ng rŏng ƀôh tơ̆ hơnăp đei gre kơna kơchăng, pơm dă ƀiơ̆ đei tơdrong sar bar trong nơnăm. Atŭm hăm ‘noh trong iung jang pơrô̆ pơrôp, pơtho tơbăt, xek tơlang dôm gre  ưh kơ sơđơ̆ng ƀlep tơdrong pơkăp ‘lơ̆ng hơmơt đei truh tơdrong sar bar trong nơnăm."

Mă đơ̆ng hlôi hơnhăk đei hơ iă truh tơdrong pơm hơtŏk sơđơ̆ng kơ gre kŏng nŏng mưh kơdou tơ̆ trong glung lơ̆m gơmăng, mă lei pơklep decal rang ăn dôm kơ loăi gre ou ưh khan jing trong iung jang kơjăp ‘lơ̆ng. Jĭ gre tơgŭm ăn choh jang sa, gre kŏng nŏng hơnơ̆ng jră tơ̆ ‘mi pru pơdach ‘mi hmach pơdăr, kơ ‘năr tŏ sa kơtang, teh dom, preh ƀơm ‘long pơmreh ou to kơna hlak decal rang jei hyăh, tơkloh, huŏng. Vă pơm dă ƀiơ̆ hơmơt đei tơdrong sar bar trong nơnăm, gre kŏng nŏng tơ̆ Tây Nguyên kăl đei vei lăng năng tông kơjăp rim tơdrong pơkăp kih thuơ̆t sơđơ̆ng, đơ̆ng hơnih pơm tơlĕch gre kŏng nŏng hloi.