'Nou jĭ sơnăm hŏk mă blŭng anih jang pơtho pơhrăm yak ah jăl jang 'nao đơ̆ng rŏng kơ dêh char Đăk Lăk tơmơ̆t hơdai hăm Phú Yên. Hơnăn kăp gĭt đei hơnih jang rơih pơkăp noh “Kiơ̆ tơchơ̆t – Gơh hơgei – Pơtơm kơtang – Hơtŏk tơ-iung". Đơ̆ng rŏng tơmơ̆t hơdai, anih jang pơtho pơhrăm kơ dêh char Đăk Lăk pơih să hăm hloh 1.370 anih pơtho đơ̆ng jăl mầm non truh THPT, pơtho tơdrong jang păng pơtho thường xuyên.

Jơ̆p dêh char dang ei đei hloh 700.000 hŏk tro, bơngai hŏk atŭm hăm hloh 38.400 kang ƀô̆ kơpal, bơngai pơtho, pơtrŏ hăm tơdrong kăl vă hơtŏk pơtho pơhrăm. Tơchơ̆t lơ̆m sơnăm hŏk ou, dêh char Đăk Lăk hơdrin hơtŏk kơsô̆ hnam trưng đei jơnei tơchơ̆t đơ̆ng teh đak truh 55%, vei sơđơ̆ng bơngai đŏu tôt ngĭp THPT hloh 98% păng pơtoi hơtŏk hơtŏ tơdrong tơnăp lơ̆m pơtho hŏk pơhrăm đơ̆ng dôm tơring hiôk hăm tơring tơnap tap, pơkăp truh tơdrong hơtŏk hơtŏ hơnơ̆ng păng kơjăp sơđơ̆ng ăn tôm anih pơtho pơhrăm.

Tơ̆ Gia Lai, hlŏh 760.300 ‘nu hŏk tro tơ̆ 1.200 hnam trưng vang pơm lêh mât hŏk sơnăm hŏk ‘nao 2025-2026. ‘Năr rŏ tŏ hơlăng, kial rơngơp, ưh đei ‘mi pơm ăn năr đĭ đăng kon pơlei năm ba kon hơ ‘lơ̆p năm hŏk roi hơiă hlŏh dơ̆ng. Sơnăm hŏk ‘nao, dêh char Gia Lai đei 760.306 ‘nu hŏk tro tơ̆ 23.017 lăm hŏk, hăm 37.347 ‘nu kăn ƀô̆, thây kô, bơngai jang.

Mă lei, anih pơtho pơhrăm oei ưh kơmăh hlŏh 3.500 ‘nu bơngai pơting hăm kơsô̆ hơgăt, oei tơmam vă pơtho pơhrăm tơ̆ lơ tơring, mă loi tơ̆ tơring sơlam ‘nŏh oei ưh kơ ‘lơ̆ng. Kơplăh dang ei, anih pơtho pơhrăm vă roi tơƀôh ăn Anih vei lăng kon pơlei dêh char Gia Lai iŏk dơ̆ng 1.428 ‘nu thây kô pơtho, atŭm hăm ‘nŏh hơmet ming thây kô pơtho mă lăp, mă loi hăm dôm môn hŏk ‘nao kiơ̆ tơdrong pơtho pơhrăm phổ thông 2018. ‘Nâu jĭ tơdrong hơmet tôch gĭt kăl vă pơm ‘lơ̆ng ăn tơdrong pơtho pơhrăm lơ̆m sơnăm hŏk ‘nao.