Ah rim kơsơ̆, Cham pơhiơ̆ Đại Đoàn Kết, tơ̆ pơlei tơm Pleiku, dêh char Gia Lai, đei lơ bơngai truh pơchơt, pơtâ̆p hơkâu jăn păng chă tơmang lăng. Đe yă ƀok kră noh chă yak jơ̆ng tơ̆ dôm anih rơngơp hlăng ‘lơ̆ng. Rim khul hơdruh tơdăm hăt hot kơdâu jơ̆ng, oei đe hơ-ioh noh chă hơnul pơsuh duh băl pơma hơhiĕk. Minh ƀar khul mơlôh noh akŏm chă hơri, tơdra brŏ guitar atŭm hăm nơ̆r hơri hiôk ang jơva ah anih yơ̆p ‘long tăp dăr Rŭp man Ƀok Hô. ‘Nhŏng Siu Thưm, oei tơ̆ Plei Ku Roh, pơlei tơm Pleiku ăn tơbăt, cham pơhiơ̆ ưh hơdrô̆ jing anih pơchơt tơ̆ ‘nguaih, mă oei jing anih akŏm joh ayŏ, anih pơgơ̆r dôm tơdrong kăp gĭt kơ dêh char: “Đơ̆ng mă Cham pơhiơ̆ Đại Đoàn Kết đei pơjing, lơ tơdrong joh ayŏ kăp gĭt hlôi đei pơgơ̆r, hơ-‘nguơ̆u kơ Ƀok Hô păng pôk pơ-ư gah joh ayŏ juăt jue kơ hơdrung bơngai kon kông nhen Jarai, Bahnar, Sêđăng. Tơ̆ Pleiku Roh hăt hot vang akŏm hăm dôm tơdrong pơdreh chĭng chêng, hơri hơxuang, tơbang joh ayŏ juăt jue truh hăm bôl boăl hơtaih jê̆ băt. Dôm tơdrong akŏm âu ưh hơdrô̆ tơgŭm pơtho joh ayŏ juăt jue ăn đe mơlôh ma ưoei hơvơn đe oh hŏk hơlen păng vei răk joh ayŏ mă yă ƀok pơsư̆ ăn”

Tơ̆ anih kơjung păng kăp gĭt hloh kơ cham pơhiơ̆ noh Rŭp man Ƀok Hô pra ti kơ kuh. Rŭp man kơjung 10,8m, đei pai hăm kong, ‘măn ah anih tơmo kơjung 4,5m. Yă Rơ Chăm H’Réo – sơ̆ jang Kơdră Anih jang Măt trâ̆n tôh kuôk Việt Nam dêh char Gia Lai – vih tơƀlŏk ah sơnăm 2012, kon pơlei kon kông sơng rŭp mă nhen lĕ sơng Ƀok vih tơmang tơ̆ pơlei pơla:  "Khei năr noh, ah rŭp Ƀok Hô đei ‘nhăk truh trong hơ̆ng An Khê, kon pơlei dơ̆ng 2 pah trong pơdreh chĭng chêng păng lơ bơngai jrơu: “Ƀok hlôi vih truh tơ̆ pơlei! Ƀok hlôi vih hăm kon pơlei bơ̆n bơih!” Ah mă rŭp Ƀok đei tơ-iung tơ̆ cham pơhiơ̆, kon pơlei akŏm pơdrehc hĭng chêng, hơxuang tăp dăr Rŭp man Ƀok Hô. Păng đơ̆ng noh, Ƀok Hô hlôi tơpă vih hăm kon pơlei Jarai, vih hăm kon pơlei Tây Nguyên. Dei rŭp man Ƀok, kon pơlei roi chơ̆n jơhngơ̆m lui ngeh lơ̆m tơdrong hơrih, khŏm mă pơjing tơdrong hơrih ‘nao, tơguăt tơguăl tôm kon pơlei, tơgŭm dih băl hơtŏk tơ-iung pơjing pơlei pơla roi năr roi hơtŏk hloh"

Tơ̆ Cham pơhiơ̆ Đại Đoàn Kết, atŭm hăm rŭp man oei đei lơ tơdrong ming man tơguăt hăm um rŭp Ƀok Hô. Hơdah hloh noh um tơmo chrah hăm um rŭp Ƀok tơguăt tơjê̆ hăm kon pơlei kon kông Tây Nguyên tŏk bŏk oei akŏm et xa, khei năr pơm jang... Păng kơthơ Ƀok pơtruh ăn Hop akŏm kon pơlei kon kông tơring Pơbah ah sơnăm 1946 đei chrah lơ̆m tơmo, pơkăp tơdrong kăp gĭt lơ̆m jơhnơr hơrih gah tơdrong mă Ƀok păng Jơnŭm pơgơ̆r teh đak lăng truh kon pơlei kon kông.

Atŭm hăm noh, Anih Tơƀôh Pơdah Hồ Chí Minh pơm jang tơ̆ Gia Lai-Kon Tum pơdah lơ tơmam kăp gĭt gah tơdrong hơrih, tơdrong pơm jang kơ Ƀok. Hnam soi ƀlŏk kơ Ƀok Hô tơ̆ cham pơhiơ̆ jing anih mă kon pơlei Gia Lai truh soh plang hlôt nhang ƀlŏk tơbăt, pôk bơnê kơ Ƀok lơ̆m rim ‘măng truh lêh tih kăp gĭt. Ƀok Hà Sơn Nhin – sơ̆ jang Ƀĭ thư Tĭnh uy Gia Lai ƀrơ̆k kơ jơhngơ̆m tơroi gah Rŭp man Ƀok Hô tơ̆ Cham pơhiơ̆ Đại Đoàn Kết thoi âu: “Ƀok akhan kon kông ayơ mă Mường, Mán, Jrai, Ê-đê, Bahnar, Xê-đăng adoi ‘nhŏng oh minh hnam. Jơnŭm pơgơ̆r teh đak adoi lăng truh, noh kon pơlei Tây Nguyên hơnơ̆ng băt truh Ƀok, hơnơ̆ng pơm kiơ̆ nơ̆r Ƀok. Pơlei tơm Pleiku păng rim anih jang kơ dêh char đei lêh akŏm, tơdrong jang kăp gĭt adoi pơgơ̆r tơ̆ âu, jô̆ hloi akŏm festival, chă tơmang pơhiơ̆; rim khul linh đei tơdrong gĭt kiơ adoi truh tơ̆ âu vă ƀlŏk bơnê kơ Ƀok, tơbang đon bơnôh ƀlŏk hơdơ̆r, sơkơ̆t pơtoi hơdrin jang keh sơnong jang, tơgop tơ-iung pơjing teh đak roi năr roi ‘lơ̆ng rŏ, sơnêp sơnua hloh”

Rŭp man Ƀok Hô hăm kon pơlei kon kông Tây Nguyên tơ̆ pơlei tơm Pleiku, dêh char Gia Lai jing tơdrong joh ayŏ kăp gĭt tih tên. ‘Nâu jing tơmam pôk mă Đảng, Teh đak asong ăn Đảng ƀô̆ păng kon pơlei kon kông tơ̆ Gia Lai, rim dêh char Tây Nguyên tơbang đon bơnôh đơ̆ng Đảng, đơ̆ng Ƀok hăm kon pơlei kon kông Tây Nguyên păng adoi jing đon bơnôh kon pơlei kon kông Tây Nguyên hăm Đảng, hăm Ƀok Hô. Hăm jơhngơ̆m đon băt ‘mêm kơ po hăm Ƀok Hô ‘mêm kơ-eng, tơpă Rŭp man oei lơ̆m plei nuih kơ rim kon bơngai Tây Nguyên gô tơgop pơjing đei Rŭp man Ƀok Hô oei đei âu, ling lang oei lơ̆m tơdrong hơrih joh ayŏ kơ  Tây Nguyên.