Tưk tơiung tơdrong juăt mât 1 ƀơ̆r đon, hăm jơhngâm don tơgŭm băl mưh đei tơdrong pơmat tat, Anih chĕp kơ̆l Đảng dêh char Đắk Nông tơlĕch tơdrong krao hơvơn vang tơra tơgop tơgŭm ăn kon pơlei hiong răm đơ̆ng ‘mi kial kơsô̆ 3. Đơ̆ng rŏng kơ pơm lêh, Anih MTTQ Việt Nam dêh char Đắk Nông hlôi chih măt tơgŭm 1 ti hlak jên. Anih chĕp kơ̆l đảng dêh char Đắk Nông krao hơvơn kon pơlei lơ̆m dêh char vang tơgŭm, đei tŏ sĕt tơgŭm tŏ sĕt, đei lơ tơgŭm lơ, vă tơgŭm ăn kon pơlei tơ̆ dôm dêh char pŭ răm đơ̆ng ‘mi kial kơsô̆ 3 yak hlŏh pơmat tat, hơmet ming hiong răm đơ̆ng rŏng kơ ‘mi kial, đak lơ̆p. Anih chĕp kơ̆l Đảng dêh char Đắk Nông pơjao ăn Anih Mặt trận Tổ quốc Việt Nam dêh char pơgơ̆r, sơng iŏk tơmam, jên vă tơgŭm ăn kon pơlei hiong răm, athei bơ̆ jang mă hrĕnh păng đei yoa ‘lơ̆ng.

Ƀok Trần Minh Quân, Phŏ Kơdră Anih MTTQ Việt Nam dêh char Đắk Nông ăn tơbăt, tơ̆ hơnăp dang ei, dêh char chih măt tơgŭm 1 ti hlak jên: “Mă đơ̆ng dêh char oei pơmat tat ră, mă lei tưk tơiung tơdrong juăt ‘lơ̆ng đơ̆ng hơdrĕch hơdrung, hơnơ̆ng mât 1 ƀơ̆r đon, tơgŭm băl, đei nơ̆r pơtho đơ̆ng Kơdră chĕp kơ̆l Đảng dêh char ‘nŏh Anih MTTQ dêh char krao hơvơn kon pơlei lơ̆m dêh char, dôm bơngai đei ƀôh ‘nŏh vang tơgop lơ ƀiơ̆, dôm bơngai ưh đei vang tơgŭm kiơ̆ tơdrong gơ̆h tơgŭm đơ̆ng kơdih, vang ‘mơ ‘met ƀiơ̆ lơ̆m rim năr vă tơgŭm ăn kon pơlei tơ̆ tơring găh Tu ƀơm ưh ‘lơ̆ng đơ̆ng ‘mi kial, đak lơ̆p.”

Mĭnh tơdrong jang sơng đei lơ kon pơlei tơ̆ Buôn Ma Thuột, dêh char Đắk Lắk truh, ‘nŏh jĭ pơgơ̆r lơ gre “chơ tơgŭm đĕch” vă chơ dôm tơmam yoa kăl vang tơgŭm ăn kon pơlei tơ̆ tơring đak lơ̆p găh Tu. ‘Nhŏng Bùi Xuân Phong, tơ ‘ngla gre Phong Thương, kơdâu kiơ̆ trong Thái Bình – Buôn Ma Thuột tơroi, dôm “ ‘măng gre chơ tơgŭm đĕch” vă chơ chuĕn đĭ đăng tơmam yoa kăl tơra tơgop đei ăn dôm dêh char Thái Nguyên, Lào Cai, Yên Bái … vă chă tơgŭm ăn kon pơlei:

“Đei lơ gre oei gô tơ̆ ‘ngoăih, hăm jơhngâm đon atŭm ‘nŏh 3 jơ kơsơ̆ ‘năr 14/9 khul vă kơdâu đơ̆ng âu năm tơ̆ dôm dêh char găh Tu. Tơ̆ âu hăm jơhngâm đon kơchăng gre yơ tăh ƀĕnh tơmam ‘nŏh ăn kơdâu hơdrol hloi. Tôch hơiă yoa lăp đơ̆ng 8 jơ gơmăng hei nhôn tơlĕch tơdrong jang ‘nâu mă lei truh pơgê ‘nâu kon pơlei Đắk Lắk lĕch tơgŭm tôch lơ. Kơplăh dang ei apinh bơnê kơ rim bơngai vang tơgŭm tơmam”.

Lơ kon pơlei vang truh tơgŭm tơmam, đơ̆ng đe oh hŏk tro, đe duch đe ma, bơngai vei lăng, bơngai jang, ƀô đô̆i păng đei ƀok yă kră hai. Yă Trần Thị Cảnh, 81 sơnăm, tơ̆ plt Bà Rịa, dêh char Bà Rịa – Vũng Tàu, tơroi: yă tŏk tơ̆ Đắk Lắk năm ngôi tơ̆ kon drŏ kăn sư. Mưh iŏk đei nơ̆r tơroi găh tơdrong tơgŭm âu ‘nŏh yă athei kon sâu chơ năm răt mi tôm vă tơgŭm ăn kon pơlei tơ̆ tơring ‘mi kial, đak lơ̆p: “Jĭ jơhngâm, ơh dêh, ưh băt vă pơm thoi yơ, inh đĭ kră bơih. Ƀôh lơ̆m mang tơpôl đei nơ̆r tơroi găh tơdrong tơgŭm âu kơna inh jang kiơ̆ hloi, vang tơgop tŏ sĕt vă tơgŭm ăn kon pơlei tơ̆ noh”.

Tơdrong jang tơgŭm ăn kon pơlei tơ̆ tơring ‘mi kial đak lơ̆p tơ̆ găh Tu đei pơgơ̆r hơnơ̆ng ưh jô̆ kơmăng dăh mă tơ̆ ‘năr. Tơgĕch tơ̆ kơmăng, kon pơlei oei hơnơ̆ng năm truh tơ̆ Cham xă 10/3, plt Buôn Ma Thuột, dêh char Đắk Lắk vă tơgop bơ̆n kơthŭng mi tôm, đak nhă, tơmam xa, phe, hơbăn ao, ao đong, đak toh vă tăh lơ̆m dôm tông gre “chơ đĕch” vang tơgŭm ăn kon pơlei tơ̆ tơring găh tu oei pŭ lơ hiong răm yoa đơ̆ng ‘mi kial Yagi.

Kŭm hăm klo păng kon ‘lơ̆p chơ kơthŭng hơbăn ao truh tơ̆ anih mong tơmam, mŏ Lê Thị Bảo Hiên, tơ̆ phường Tân Lợi, plt Buôn Ma Thuột tơroi: “Oh ƀôh mih ma duch nă tơ̆ Buôn Ma Thuột chih hơtŏk lơ̆m mang, pơgê hei năm jang oh ‘nao băt kơna brŏk đơ̆ng jang, tơ̆ kơmăng oh tơgĕch rơih hơmet hơbăn ao vă tơgop ăn. Oh tôch pơngot yoa tam mă sŏng xa kiơ. Oh ‘mĕh gơih jơhngâm đon băt ‘mêm đơ̆ng bơngai Buôn Ma Thuột truh hăm kon pơlei tơ̆ tơring găh Tu. Hơpơi ‘mĕh mih ma duch nă tơ̆ noh liĕm kâu, hiôk hian.”

Hăm trong jang “bu đei kŏng tơgop kŏng, bu đei tơmam tơgop tơmam”, tơdrong chơ chuĕn, tăh tơmam tơ̆ dôm gre tih vă tơtom chơ ba ăn tơring găh Tu đei bơ̆ jang tôch hrĕnh. Sut đak pơ uh pơ ang, hăt hot nhă 1 kơchŏk đak, ‘nhŏng Nguyễn Văn Cơ tơ̆ phường Tân Lợi, plt Buôn Ma Thuột pơma: “Inh đŏk lơ̆m facebook đei chih nơ̆r, gơnơm kơ đe tơdăm vang tung pơdŭ tơmam, ƀât oei hao gre kơdâu tơ̆ âu ‘nŏh inh tơgĕch jur vang tơgŭm hăm dôm bơngai tơ̆ âu hloi. Đei 3 jơ ‘nău bơih, đe ‘nhŏng oh tung pơdŭ hơdrol, tăh đang dôm gre bơih. Inh ƀôh ‘mêm mơnat kơ kon pơlei tơ̆ tơring găh Tu dêh, ba tơgŭm đei yă kiơ ‘nŏh tơgŭm yă đei, jang đei tơdrong kiơ ‘nŏh jang tơdrong ‘nei.”

Lăp lơ̆m 1 măng 1 năr, kon pơlei Đắk Lắk hlôi tơgop đei 5 gre chơt tơmam, jô̆ păh lăp 1 gre đei vă jê̆ 20 tân tơmam yoa kăl vă chơ ba ăn kon pơlei tơ̆ dôm dêh char găh Tu oei pŭ lơ tơdrong hiong răm đơ̆ng ‘mi kial, đak lơ̆p.