Lơ̆m chăl sơnăm tơblăh vang, rim hơdrung Tây Nguyên minh nơ̆r ƀơ̆r đon kiơ̆ Đảng vang iung jang tơgŭm ăn tơblăh vang dĭng truh năr rơngei keh kong.

Jĭ bơngai kon hơ ‘lơ̆p hơdrung Xơdang, oei tơ̆ pơlei Kon Gung, tơring Đăk Sao, apŭng Tu Mrông, dêh char Kon Tum, đĭ jơhnơr kơ dih ƀok A Tủi tơklep  kơjăp hăm khul ƀô̆ đô̆i. Atŏk tơ iung lơ̆m dôm sơnăm tơlăh ayăt Mi đơ̆ng noh pơdơ̆h jang hăm kơlong Kơdră chĕp pơgơ̆r Ƀô̆ đô̆i apŭng Đak Tô, ƀok A Tủi ling lang ƀlŏk hơdơ̆r nhen ƀô̆h dai dai đĕch dôm sơnăm tơblăh kơtang ‘noh sơ̆. Sơnăm au ƀlep jơ ‘năr tơbăt 48 sơnăm rơngei tơring Pơbăh-Teh đak rơngei keh kong, Ƀô̆ đô̆i so A Tủi ‘măn lơ jơ ‘năr năm tơlang lăng kưodrăn tơblăh sơ̆, bro mă ƀok hăm rim bôl boăl hlôi nuih mơng iung tơblăh păng iŏk đei jơnei, nhen B15, kơdrăn tơblăh Đăk Tô- Tân Cảnh:“Năr 30/4 nhôn đơ̆ng kơdrăn tơblăh B15 iung năm vang tơgŭm tơblăh tơ̆ dêh char Quảng Ngãi, lơ̆m mă tŏk bŏk pơtrui ‘nŏh nhôn kơtơ̆ng ang hlôi tơblăh rơngei Tơring Pơbăh bơih. Lơ̆m mă  noh nhôn kơdŭn brŏk tơ̆ kơdrăn tơblăh B15 tơ̆ Kon Tum dang ei ‘nŏh Hnam trương Quân sự địa phương. Mưh kơtơ̆ng ang hlôi đei rơngei keh đang tơring Pơbăh ‘nŏh ‘nhŏng oh nhôn chơt hơ iă ‘nă hal pă băt dang yơ, Ƀô̆ đô̆i nhôn vang tap ti iơ iơ̆r chhôk hơ iă ‘nă hal kơ yuơ tĕh đak hlôi yak hloh tơdrong tơblăh vang pơm ăn pham lĕch sĕch huŏng bơih. ‘Nhŏng oh ƀô̆ đô̆i nhôn ling lang mơ̆ng kiơ̆ tưodrong pơjao đơ̆ng kơdră kơpal, ‘nŏh hơnăp jang git kăl hlŏh kơ bơngai ƀô̆ đô̆i’.

Ƀok Y Tánh Mlô (bơngai M’Nông) tơ̆ pơlei Phôk, xăh Ea Rbin, apŭng Lăk, dêh char Dak Lak adoi găn ga khei năr hli hlơt tơblăh tơblŭng tơ̆ tơring teh Tây Nguyên.

Ƀok akhan, tơdrong erih khei năr noh tơnap tap hrat hrĭn, mă lei adoi oei minh bơnôh kiơ̆ Đảng, kiơ̆ kăch mang:  “Đảng, kăch mang bơ̆n đei tơ-iung pơjing vă hơvơn kon pơlei oei lơ̆m bri vă kiơ̆ kăch mang. Đơ̆ng xơnăm 1958 truh xơnăm 1975, tơdrong erih lơ̆m bri noh tơnap tap hloh. Kon pơlei jang mir rei ƀa, pơtăm ƀum ƀlang truh xơnăm 1972- 1973 noh Mih xăi pơgang pơnhŭl da cam. Ƀô đô̆i păng kon pơlei pơngot rơvĕt, chă xir ƀum nhĕk, gơ̆ tơƀăng hre, pĕ ‘nhot bri chă xa vă kơ hơrih, kơdih chă tơmam xa, mă kon pơlei adoi minh bơnôh kiơ̆ Đảng, kiơ̆ kăch mang”.

Tơring Nâm Nung, apŭng Krông Nô, dêh char Đắk Nông ‘noh tơring kăn kư̆ lơ̆m chăl Bơngai nuih mơng N’Trang Lơng iung tơjră Phalăng tơblăh pơjei teh đak, păng đei iung jang lơ̆m ƀar ‘măng iung tơblăh pơm rơngei hơdrĕch hơdrung. Tơ̆ au đei kăn kư̆ B4-khul dêh char IV, hlôi đei pơkăp jing hơnih gru gra gĭt kăl dăr sơnăm kĕch mang kơ teh đak. Nâm Nung tŏk bŏk đei dêh char Đak Nông tơ iung pơjing jing mĭnh hơnih pơdơ̆h jơ̆ng jăl trong tơmang pơhiơ̆ “Tơdrong hơ-‘mon kơ đak păng ŭnh” găh Hơnih cham să groi teh plei teh UNESCO Đak Nông. Kăn kư̆ Nâm Nung ‘nŏh "hơnih tơm" pơtho tơbăt tơdrong joăt joe kĕch mang hăm tơmoi lơ̆m iung năm tơmang pơhiơ̆ vih tơ̆ kơtu so. Nghệ nhân Y Xuyên, oei tơ̆ bon Ja Rah, tơring Nâm Nung, ƀlŏk hơdơ̆r dơ̆ng dôm khei năr atŭm hăm kon pơlei tơgŭm ƀô̆ đô̆i tơblăh Mi:“Sơ̆ tơblăh vang tôch kơtang, ƀôm min tôm tơdrong, nhôn oei lơ̆m bri đei ‘măng gre păr tơdruh ƀôm ‘nŏh nhôn jur kơ ‘nơp lơ̆m hơlŭng. Mưh gre păr yak hloh nhôn lĕch iung jang tơgŭm ƀô̆ đô̆i  chă pơdŭ ăn bơ̆n ƀrơ̆m phao păng phe ƀa. Mư̆h ƀô̆ đô̆i ưh kơ măh đak măm, ƀoh ... ‘nŏh nhôn pŭ ba năm tơ̆ bri tơgŭm ăn ƀô̆ đô̆i”.