Tơ̆ dêh char Kon Tum, kơdră chĕp pơgơ̆r păng kon pơlei lơ tơring lơ̆m dêh char hlôi pơgơ̆r Pơm lêh Soi yôk ƀok Tơnơm Hùng Vương. Đei pơgơ̆r lơ̆m 2 năr đơ̆ng năr 28-29/4, ‘nŏh jing năr 9 păng 10/3 âm lĭch, Pơm lêh Soi yôk ƀok Tơnơm Hùng Vương đei kơdră tơring păng kon pơlei apŭng Đăk Hà, dêh char Kon Tum pơgơ̆r tơ̆ hnam chua Tháp Kỳ Quang, Thôn 3, tơring Đăk Mar.

Atŭm hăm Pơgơ̆r kơ̆m kang kơnang giĕng hăm tơdrong tơm Soi tơbeh, soh hlôt nhang, glơng ba pơkao, tơmam drăm soi tơbeh ƀlŏk hơdơ̆r ƀok pơtao Hùng, găh tơdrong pơgơ̆r pơchơt đei lơ tơdrong pơgơ̆r nhen: pơlong ‘nŭng ƀĕng chưng, tơdui, tŏk hao ‘long tơsĕr, joh hơri… Tơbăt jơhngơm đon chơt hơ iă tơ̆ Pơm lêh Soi yôk ƀok tơnơm kơdră tơring păng rim hơnih bơ̆ jang apŭng Đăk Hà, dêh char Kon Tum hlôi pôk ăn jên hŏk pơhrăm ăn hŏk tro tơnap tap hŏk hơgei păng pôk ăn tơmam drăm ăn ŭnh hnam dơnuh. Mŏ Y Kha, oei tơ̆ pơlei Kon Klốc, tơring Đăk Mar, lơ sơnăm vang năm Pơm lêh Soi yôk ƀok tơnơm Hùng Vương tơ̆ hnam chua Tháp Kỳ Quang tơbăt:“Hnam Chùa păng pơlei Kon Klốc ling lang vang pơgơ̆r păng tơgŭm djru dih băl. Tơ̆ au kon pơlei kon khop păng kon pơlei lui Phật ling lang tơgoăt tơgoăl pôm nơ̆r ƀơ̆r đon, vei lăng năng tông dih băl. Lơ̆m jơ ‘năr Soi yôk ƀok tơnơm Hùng Vương nhôn vang pơchơt pơ hiơ̆ hăm hnam Chuà, kon pơlei nhôn vang tôn chĭng chêng, hơsoang, hơri vă sơng hơvơn tơmoi mơ̆t lơ̆m hnam Chua, vang pơgơ̆r pơm lêh Soi yôk ƀok tơnơm Hùng Vương. Hăm kon pơlei tơ̆ au, Hnam Chuà jei hơnơ̆ng tơgŭm djru tơmam drăm, kon pơlei jei vang chă tơra tơgop tŏ sĕt jơhngơ̆m bơ̆n ăn hnam Chuà, mă hơdăh ‘nŏh vang pơgơ̆r lơ̆m năr lêh Têt vă tơgoăt tơgoăl dih băl kơjăp hloh dơ̆ng ƀar păh Hnam Chua hăm pơlei Kon Klốc’’.

Ƀơ̆t 'măng âu, dêh char Lâm Đồng hăt hot hăm dôm tơdrong jang lơ̆m Giĕng lêh măh Tơmang pơhiơ̆ Lâm Đồng xơnăm 2023. Hăm hơnăn “Lâm Đồng – Groi kông nuih mơng”, Giĕng lêh măh Tơmang pơhiơ̆ Lâm Đồng pơgơ̆r đơ̆ng năr 27/4 truh năr 3/5 tơ̆ jâ̆p dôm apŭng, pơlei tơm lơ̆m dêh char. Truh hăm Giĕng lêh măh Tơmang pơhiơ̆ Lâm Đồng lơ̆m dôm năr âu, tơmoi gô đei hơlen, tơmang lăng lơ tơdrong kăp gĭt nhen: Lêh akŏm tơdra hơri apŭng plenh teh; Cham char pơdăh tơroi joh ayŏ kon kông lơ̆m dêh char; Cham char akŏm tơmam xa “Tơmam xa 'lơ̆ng Đà Lạt”; Pơdăh um joh ayŏ “Pơlei pơla – Kon bơngai Tây Nguyên – Tơring tơter đak dơxĭ Tŏk Bŏk”; Tơdrong pơdăh joh ayŏ kră xơ̆ păng pơdăh hơbăn ao hrŭk juăt jue  - “Um ai 'lơ̆ng rŏ Mŭk drăm Joh ayŏ Pơbăh Tây Nguyên”. 'Nguaih kơ noh, lơ̆m pơkăp Giĕng lêh măh Tơmang pơhiơ̆ Lâm Đồng oei pơgơ̆r tơdrong pơlong Pơdreh Chĭng chêng Tây Nguyên “Nơ̆r tơkưu Groi kông”, Pơlong kơdâu axeh ưh đei an; pơdăh dơ̆ng “Et pơkong kơ bơngai K’ho”, “Et xô̆ ƀa đum” v.v…

Atŭm hăm dôm tơdrong jang Giĕng lêh măh Tơmang pơhiơ̆ Lâm Đồng, et yôk Ƀok Tơnơm Hùng Vương xơnăm âu adoi đei pơgơ̆r tơ̆ Anih tơmang pơhiơ̆ Tơkơi Prenn Đà Lạt. Kiơ̆ kơ yă Nguyễn Thị Bích Ngọc, Phŏ Kơdră Anih Joh ayŏ, Tơplŏng kơdâu păng Tơmang pơhiơ̆ dêh char Lâm Đồng, rim tơdrong jang adoi đei pơgơ̆r hloh hlăng, vei xơđơ̆ng jong ăn kon pơlei păng tơmoi truh tơmang. Yă Nguyễn Thị Bích Ngọc ăn tơbăt: “Dang ei dôm tơdrong jang adoi đei pơgơ̆r hrơ̆p minh 'măng lơ̆m jâ̆p 12 apŭng, pơlei tơm lơ̆m dêh char. Lơ̆m khei năr pơgơ̆r Giĕng lêh măh Tơmang pơhiơ̆ noh adoi pơgơ̆r tơdrong jang chĭnh trĭ kơ dêh char hloi, noh jing Xoi Yôk Ƀok Tơnơm Hùng Vương. Xoi Yôk Ƀok Tơnơm Hùng Vương xơnăm âu đei dôm tơdrong jang chĕp vei kơjă găh joh ayŏ, mŭk drăm lơ̆m tơring teh kơ dêh char. Vă chĕp vei răh, pơm jang răh, jing tơmam drăm kăp gĭt ăn tơmoi truh tơmang tơ̆ pơlei tơm Đà Lạt, ƀơ̆t truh hăm dêh char Lâm Đồng hơlen băt hơdăh”.

Vang năm Pơm lêh Soi yôk Ƀok tơnơm Hùng Vương tơ̆ pơlei tơm Buôn Ma Thuột, dêh char Dak Lắc, ƀok Lê Văn Thông, oei tơ̆ phương Thắng Lợi, pơlei tơm Buôn Ma Thuột, dêh char Đắk Lắk tơbăt jơhngơ̆m đon:“Pơgơ̆r pơm lêh Soi yôk ƀok Tơnơm Hùng Vương tôch gĭt kăl, ‘lơ̆ng hơ iă. Jĭ kon pơlei teh đak Việt, ba hưch hanh hơmanh bơnê đei vang năm Pơm lêh Soi yôk Ƀok tơnơm Hùng Vương đei teh đak pơgơ̆r, kơdră tơring păng rim hơnih bơ̆ jang vei lăng năng tông tôch tơnăp, ‘lơ̆ng hơ iă rim tơdrong. Kon pơlei nhôn tôch chơt hơ iă ‘nă hal păng lăp đon tơgum djru tơdrong “nhă đak chăm kơtu”, lăng tông nông gia pơgơ̆r Soi yôk Ƀok tơnơm lơ lau.

Lơ tơdrong akŏm joh ayŏ, tơmam xa, lêh akŏm 'lơ̆ng đei pơgơ̆r ăh năr 30/4 păng năr 1/5 tơ̆ Gia Lai gô ăn kon pơlei păng tơmoi đei lơ tơdrong rơih vă hơlen băt, pơchơt pơsuh lơ̆m 'măng pơdơh đunh năr.

Pơdơh lêh truh 5 năr noh kon pơlei păng tơmoi đei lơ tơdrong chă rơih anih tơmam pơchơt ƀơ̆t năm truh tơring groi kông Gia Lai. Hrau atŭm hăm tơdrong xơng kơ kuh kơ Năr đei iŏk jơnei tơring pơbăh rơngei teh đak năr 30/4 păng Năr jang Apŭng plenh teh năr 1/5, pơlei tơm Pleiku hăm dôm anih truh tơmang 'lơ̆ng tŏk bŏk oei đei hơmet pơ-'lơ̆ng um ai tơring tơrang vă xơng tơmoi truh tơring kông kơjung; Lơ̆m jâ̆p trong kơphô̆ tơ̆ yơ adoi đei kơtol ƀăng rôl, hla kơ, pơjing hê̆ uma i trong kơphô̆ roi chơt hơ-iă đơ̆ng rŏng đunh khei năr rơnguơ̆ kơyuơ đơ̆ng pơrang jĭ Covid-19. 'Nguaih kơ dôm anih pơchơt pơhiơ̆, dôm tơdrong jang joh ayŏ - tơplŏng kơdâu xơng năr Lêh tih đei pơgơ̆r jâ̆p jă dôm anih mă đei ưh ang nhen Cham pơhiơ̆ Đại đoàn Kết, Cham pơhiơ̆ Đồng Xanh, Cham pơhiơ̆ Diên Hồng hơnơ̆ng jing tơdrong rơih iŏk mă blŭng đơ̆ng tơmoi lơ̆m păng 'nguaih kơ teh đak kơlih đei lơ tơdrong pơchơt tơ̆ 'nguaih păng dôm tơdrong kăl hadoi, hơnơ̆ng đei pơm 'nao vă 'măn ăn tơmoi truh tơmang hơlen băt. Pơmai Siu Hương, đơ̆ng apŭng Chư Prông tơroi, Lêh xơnăm âu, pơmai pơtoi 'nhăk unh hnam năm tơmang tơ̆ anih tơmang pơhiơ̆ Biển Hồ kơlih tơ̆ âu đei cham char 'lơ̆ng rŏ, đei anih pơdơh oei ăn unh hnam gơhc hă chŭp um âu to: “Lơ̆m 'măng lêh 30/4, 1/5 âu, inh 'nhăk dôm bơngai lơ̆m unh hnam năm pơchơt tơ̆ Biển Hồ, kơlih tơ̆ âu cham char guăng 'lơ̆ng mă ataih đơ̆ng apŭng. Inh adoi hơpơi 'meh anih jang vei lăng hơmet ming pơ-'lơ̆ng anih pơchơt tăp dăr dơnâu đak Nueng, đơ̆ng noh hơvơn lơ tơmoi đơ̆ng dôm apŭng, xăh truh tơmang. Ăh 'măng pơdơh năr 30/4, 1/5 âu, vă rim bơngai lơ̆m unh hnam băt truh  Biển Hồ oei tơ̆ yơ lơ̆m dêh char Gia Lai kơdih”    

Tơ̆ apŭng Đăk Đoa, Khul kon pơlei choh jang sa ‘măng pơdơ̆h lêh 30/4 păng 1/5 , khul hlôi ăn rim bơngai lơ̆m khul vang pơgơ̆rt đă ƀŏng lŏng tơplŏng kơdau vă atŏk jơhngơưm đon tơgoăt tơgoăl dih băl kơjăp hloh dơ̆ng. ‘Nhŏng A lưng- kang ƀô̆ Khul kon pơlei choh jang sa apŭng Đak Đoa tơbăt:“Lơ̆m jơ ‘năr pơgơ̆r Soi yôk ƀok Tơnơm Hùng Vương păng năr rơngei tơring Pơbăh, teh đak Rơngei keh kong (30-4), Khul kon pơlei choh jang sa apŭng pơgơ̆r lơ tơdrong, pơchơt pơhiơ̆ ăn rim bơngai lơ̆m khul, jei pơgơ̆r chơt hơ iă ăn Pơm lêh hop akŏm Khul kon pơlei choh jang sa apŭng jơnei keh kong ‘lơ̆ng liĕm, nhen pơgơ̆r teh ƀŏng lŏng, năm tơmang pơhiơ̆, pơchơt pơhiơ̆... ‘Ngoăih kơ ‘noh, lơ bơngai lơ̆m khul đei ƀôh ƀiơ̆ ‘nŏh ăn ŭnh hnam chă tơmang lăng, pơchơt pơhiơ̆ tơ̆ pơlei tơm Pleiku, Nha Trang lơ̆m jơ ‘năr lêh au. Ŭnh hnam bơ̆n jei lei lăi, jơ ‘năr lêh au đe kôn mon kon hơ ‘lơ̆p năm chă tơmang lăng tơ̆ Pleiku, năm tơ̆i Quy Nhơn vă chă pơdơh pơdei, pơchơt pơhiơ̆ đơ̆ng rŏng dôm năr hŏk pơhrăm...”