- Ƀok Đinh Kre, Bí thư Đảng tơring Kon Pne, apŭng Kbang, dêh char Gia Lai tơbăt: jĭ tơring tơnap tap hloh kơ apŭng Kƀang, dêh char Gia Lai, kơ yuơ lơ loh, hăm hơnăp jang jĭ bơngai chĕp kơ̆l kơ tơring, kơdih Đinh Kre ling lang hŏk pơhrăm kiơ̆ Ƀok lơ̆m tơdrong pơm jŭk yŭk trong hơlou. Jĭ mĭnh ‘nu đảng viên, Đinh Kre ưh khan lăp tơgŭm kon pơlei lơ̆m atŏk tơ iung mŭk drăm, mă ƀok oei hơdrin chă pơrô̆ hơvơn kon pơlei vang jang kiơ̆ ‘lơ̆ng trong tơlĕch jang đơ̆ng Đảng, khôi luơ̆t Teh đak păng rim tơdrong pơgơ̆r pơting dih băl ‘mêm kơ eng teh đak truh hăm rim bơngai lơ̆m ŭnh hnam, kơtum kơtŏng păng pơlei pơla. Kiơ̆ đơ̆ng ƀok Đinh Kre, hŏk pơhrăm păng jang kiơ̆ jơhngơ̆m đon ‘lơ̆ng, trong jang hơ iă kơ Ƀok Hô kăl rim kơdră chĕp pơgơ̆r, hơnih Đảng păng đảng viên pơm jŭk yŭk trong hơlou,hlôh vao jang kiơ̆ kơtang lơ̆m 3 tơdrong: hŏk kiơ̆ Ƀok, pơm kiơ̆ Ƀok păng Pơm jŭk yŭk trong hơlou. “Kiơ̆ kơ ĭnh ƀôh tơdrong hŏk pơhrăm păng pơm kiơ̆ Ƀok hlôi mơ̆t lơ̆m jơhngơ̆m đon kon pơlei pơla, adoi nhen pơrô̆ pơrôp kon pơlei ling lang tơgoăt tơgoăl pôm nơ̆r ƀơ̆r đon. Kơdih rim kang ƀô̆, đảng viên hlôi pơm kiơ̆, jang kiơ̆ nơ̆r Ƀok băt tơgoăt mĭnh ƀơ̆r đon, pơkom, hơnơ̆ng chă pơtho khan ăn kon pơlei băt ‘mêm kơ eng dih băl, tơgŭm djru dih băl tơ iung pơjing hơrih sa ‘nao ‘lơ̆ng liĕm hloh dơ̆ng”.

- Đĭ jơhnơr jang kăch mang, Ƀok Hô hơnơ̆ng pơma truh tơdrong, athei tơƀôh trong chong glung ăn kon pơlei đơ̆ng rim bơngai kăn ƀô̆, đảng viên, blŭng a ‘nŏh jĭ pơtho tơƀôh găh đon tơchĕng, jơhngâm đon, trong arih xa tơpăt ‘lơ̆ng. Đảng viên K’Nam, jang tơ̆ Anih Krao hơvơn kon pơlei kơ apŭng Di Linh, dêh char Lâm Đồng ăn tơbăt, hlôh vao kơjăp đon tơchĕng ‘nŏh, khei ‘năr âu ki, ‘nhŏng păng đe đảng viên nai lơ̆m anih jang hơnơ̆ng hŏk pơhrăm păng jang kiơ̆ ƀok Hô lơ̆m rim tơdrong jang, mă loi jĭ năm hơdrol mưh bơ̆ jang dôm tơdrong pơjei băl ‘mêm teh đak, vang pơjing tơring tơrang ‘nao, đơ̆ng rŏng kơ ‘nŏh krao hơvơn kon pơlei tơ̆ tơring jang kiơ̆. “Đunh kơ âu 55 sơnăm, vă akhan lơ̆m sơnăm 1969, adrol kơ lôch hơchăng, Ƀok Hô ‘măn ăn đĭ đăng Đảng, đĭ đăng kon pơlei, đĭ đăng khul linh bơ̆n Nơ̆r tơtă tôch gĭt kăl. ‘Nâu jĭ hla ar chih tôch kăp gĭt lơ̆m chăl arih, jĭ đon rơgei păng jơhngâm đon ‘lơ̆ng hơiă, tơƀôh trong jang tŏk ăn kăch mang Việt Nam hrei ‘nâu păng ning mônh kơnh. Băt hơdăh tơdrong ‘nŏh, kơdih kâu inh kŭm nhen đe kăn ƀô̆, đảng viên tơ̆ tơring hơnơ̆ng adrin đĭ jơhngâm mưh bơ̆ jang, adrin hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô”.

- Ƀok Điểu Mbrâng, hơdrung Mnông, jĭ bơngai đei kon pơlei lui yom hloh tơ̆ bon Đắk R’Mon, tơring Đắk R’Moan, pơlei tơm Gia Nghĩa, dêh char Đắk Nông. Ƀok Điểu Mbrâng jĭ mĭnh lơ̆m 27 bơngai tang măt ăn Pơlei tơm Gia Nghĩa vang năm Pơm lêh hop akŏm Bơngai tang măt Mặt trận Tổ quốc Việt Nam dêh char Đắk Nông ‘măng mă V, jăl jang 2024-2029. 55 sơnăm jang kiơ̆ nơ̆r pơsư̆ đơ̆ng Ƀok Hô, ƀok Điểu Mbrâng tơbăt, kon pơlei lơ̆m pơlei ling lang tơgoăt iŏk nơ̆r pơtho khan đơ̆ng Ƀok Hô. Kon pơlei ling lang tơgoăt tơgoăl pôm nơ̆r ƀơ̆r đon, lui yom kơtang lơ̆m tơdrong chĕp pơgơ̆r đơ̆ng Đảng, trong bơ̆ jang đơ̆ng kơdră tơring. Kon pơlei jei vang iung jang kơtang rim tơdrong tơlĕch jang pơting dih băl, rim ‘măng chă hơvơn, mă kăl ‘măng pơrô̆ hơvơn tơ iung pơjing tơring tơrang ‘nao. Lơ ŭnh hnam hlôi plang ăn teh, tơgop năr jang vă pơm trong nơnăm. Hŏk pơhrăm, pơm kiơ̆ Ƀok Hô, kon pơlei kơ pơlei pơla Đắk Nông ling lang tơgoăt mĭnh ƀơ̆r đon, đĭ jơhngơ̆m đon tơ iung pơjing pơlei pơla, teh đak pơdrŏng ‘lơ̆ng liĕm. “Ƀok Hô oei ling lang lăng tông nông gia kơtang hăm kon pơlei tơ̆ Tây Nguyên păng kon pơlei bơ̆n jei lei lăi ling lang chĕp răk tơƀăk vei nơ̆r pơtho khan đơ̆ng Ƀok Hô. Hŏk pơhrăm, jang kiơ̆ jơhngơ̆m đon ‘lơ̆ng đơ̆ng Ƀok, kon pơlei kăl tơgoăt tơgoăl pôm nơ̆r ƀơ̆r đon, lui kiơ̆ păng  jang kiơ̆ Đảng, Teh đak. Kon pơlei gô hơdrin hŏk pơhrăm, tơ iung pơjing pơlei pơla, teh đak roi năr roi pơdrŏng ‘lơ̆ng liĕm.”

- Mŏ Ham, 35 sơnăm, jĭ 1 ‘nu kăn ƀô̆ Mặt trận xăh Chư Á, pơlei tơm Pleiku, dêh char Gia Lai. Lơ sơnăm âu ki, mŏ hơnơ̆ng hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô, ling lang năng tơdrong đei yoa đơ̆ng kon pơlei kăl hlŏh. Hăm đon jang tơnăp, mŏ adrin krao hơvơn, roi tơƀôh ăn kon pơlei lui kiơ̆ trong jang, tơdrong tơgŭm đơ̆ng Đảng păng teh đak. Mŏ hơnơ̆ng tơƀâp, pơma nuh, tơl tơblang ăn kon pơlei păng pơlung đe sư vang plang song teh pơm trong, bơ̆ jang dôm tơdrong hơgăt pơjing tơring tơrang ‘nao. Gơnơm thoi noh, mŏ vang pơm hơtŏk đei đon hlôh vao, mât 1 ƀơ̆r đon tơ̆ tơring. Hơdai hăm ‘nŏh mŏ oei đei kon pơlei lui, ‘mêm, kŭp yom, jĭ bơngai jang rơgei lơ̆m tơdrong hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô tơ̆ tơring. Mŏ tơroi:“Inh hơnơ̆ng pơlung rim bơngai bơ̆ jang dôm tơdrong ‘lơ̆ng, băt tơgŭm băl, păng ưh đei mơ̆ng kiơ̆ nơ̆r pơhlŭ đơ̆ng bơngai kơnê̆. Lơ̆m dôm năr lêh, inh tơtă ăn mih ma duch nă hơtol hla kơ vă tơƀôh jơhngâm đon ‘mêm kơ teh đak păng bơnê kơ đe linh hlôi lôch tang ăn teh đak, vă vei lăng tơdrong rơngei hiôk hian, vă bơ̆n gơ̆h đei tơdrong arih xa phĭ tơtŏ dơnŏ ‘lơ̆ng, hiôk chơt nhen hrei ‘nâu.”

- Đơ̆ng jơhngơ̆m đon ‘mêm kơ eng kơ Ƀok Hô, adoi pơm hơtŏk đơ̆ng jơhngơ̆m đon hơdrin yak hloh tơnap tap kơ pơlei pơla ƀĕnh ƀang tơdrong joăt joe kĕch mang, ‘nhŏng A Lấu 38 sơnăm, hơdrung Xdang, tơring Măng But, apŭng Kon Plông, dêh char Kon Tum ưh kơ ‘nhoen trong hơtăih plăih kơjung păng tơdrong tơnap tap kơ unh hnam pơnam hŏk pơhrăm. ‘Nhŏng A Lấu sơkơ̆t hơdăh, lăp đei Đảng, đei Ƀok Hô mă hơnhăk ăn kơ bơ̆n đei tơdrong phĭ tơtŏ dơnŏ ‘lơ̆ng, trong yak hiôk hian, hơnhăk ba jang pơgang, pơtho pơhrăm ... truh hăm bơngai Xdang tơ̆ Măng But. Kơ yuơ lơ loh đei bơ̆ jang, vang tơgop lơ̆m tơ iung pơjing pơlei pơla, ‘nhŏng A Lấu  ling lang hơdrin lơ̆m tơdrong jang, hơlen kơdih găh tơdrong hŏk pơhrăm păng jang kiơ̆ jơhngơ̆m đon ‘lơ̆ng kơ Ƀok Hô:“Jang kiơ̆ ‘Măng hơvơn “Hŏk pơhrăm păng jang kiơ̆ jơhngơ̆m đon ‘lơ̆ng, trong jang hơ iă kơ Ƀok Hô” kang ƀô̆ tơring, pơlei păng đĭ đăng kon pơlei jang kiơ̆ kơjăp. Rim sơnăm, tơ̆ tơring tơlĕch iung jang kiơ̆ tơdrong hŏk pơhrăm hăm pơma nơ̆r kon kông vă kơ kon pơlei hlôh vao, jang kiơ̆ ƀônh tơdrong pơgơ̆r hơvơn jang kiơ̆. Tơdrong hơrih sa kon pơlei tơ̆ tơring găh lơ gơnang lơ̆m choh jang sa, hơnăp jang kơ kang ƀô̆ lu nhôn ‘noh pơtho tơbăt, pơrô̆ hơvơn kon pơlei tơgoăt tơgoăl pôm nơ̆r ƀơ̆r đon, lui kiơ̆ lơ̆m trong bơ̆ jang đơ̆ng Đảng, jang kiơ̆ nơ̆r Ƀok Hô pơtho, kon pơlei đei hŏk pơhrăm jang kiơ̆ dôm tơdrong hle, hlôh vao khoa hŏk kih thuơ̆t vă atŏk tơ iung mŭk drăm ŭnh hnam”.

- Jĭ tơring kăn kư̆ kăch mang lơ̆m khei ‘năr tơblăh Mi sơ̆, plei Pa, xăh Cư Prao, apŭng Mđrắk, dêh char Đắk Lắk hlôi tơplih ‘nao ‘lơ̆ng rŏ, tơdrong arih xa kơ kon pơlei kon kông... roi đei ƀôh, hiôk jơnap. Lơ̆m pơlei dang ei đei vă jê̆ 200 unh hnam, hlŏh 800 ‘nu bơngai, vă rim unh hnam đei tivi, gre hon đa, điê̆n thoăi; đei yoa unh điên teh đak, đĭ đăng kon hơ ‘lơ̆p lơ̆m pơlei năm hŏk ngăl. Plei Pa ‘nao đei tơlĕch jên pơm hơmet 6 tŏ trong, akŏm đĭ đăng kơjung hlŏh 6km, đei xa yoa 1,2km trong đơ̆ng tơdrong jang “Tơ̆k hơdăh trong pơlei” yoa Anih jang đoan dêh char Đắk Lắk jang hơdoi hăm Anih jang đoan kơ công ty jang unh điên Đắk Lắk vang jang. Ƀok Y Tuân Ksơr, Bí thư Chi ƀô̆ plei Pa ăn tơbăt:“Adrol sơ̆, kon pơlei tôch pơmat tat, đơ̆ng unh điên, trong ưh kơ ‘lơ̆ng. Dang ei gơnơm đơ̆ng dôm trong jang, tơdrong tơgŭm đơ̆ng teh đak, pơlei pơla đei unh điên, trong, hnam pơgang, hnam trưng, pơlei pơla tơplih ‘nao ‘lơ̆ng hơiă. Kon pơlei lui, mơ̆ng păng jang kiơ̆ nơ̆r Ƀok Hô pơtho, pơm kiơ̆ ‘lơ̆ng dôm tơdrong hơgăt lơ̆m khôi luơ̆t đơ̆ng Đảng păng teh đak.