Tơ̆ pơlei tơm Buôn Ma Thuột, Tơdrong akŏm “Năr tôm kon pơlei plang pham ‘mêm kơ-eng” xơnăm 2023 hơvơn đei hloh 600 ‘nu kang ƀô̆, bơngai jang, khul linh truh plang pham. Kiơ̆ đơ̆ng noh đei iŏk 459 tơpu pham lơ kơluăi. Dôm jĭt ‘măng plang pham ‘mêm kơ-eng, ‘nhŏng Nguyễn Văn Kiên, tơ̆ phương Tân Thành, pơlei tơm Buôn Ma Thuột tơroi: “Inh akŏm plang pham đei 25 ‘măng bơih, ‘năr âu inh pơtoi vang akŏm plang dơ̆ng. Kiơ̆ rim ‘măng plang pham ‘mêm kơ-eng noh ưh đei kiơ ôh, rim ‘măng plang inh ƀôh xô̆ chơt ƀơ̆t gơh glơng tơgŭm ăn dôm bơngai kăl pham lơ̆m tơdrong hơmet jĭ hlăm”

Yă Ayun H’Hương, Kơdră Anih jang ‘long pơglang brê dêh char Đăk Lăk ăn tơbăt, dôm xơnăm tơjê̆ âu, minh ƀar anih jang, hnam kơmăi, kŏng ti, hnam trưng hŏk pơgơ̆r dôm tơdrong akŏm plang pham ‘mêm kơ-eng roi năr roi lơ kiơ̆ tơdrong akŏm nhen Lêh akŏm puih mak brê, ‘Năr giĕng brê, Hơyak brê... Dôm năr akŏm plang pham hlôi pơm trong ăn lơ bơngai tơgop jơhngơ̆m dŏng đei tơdrong hơrih ăn lơ bơngai jĭ jăn tŏk bŏk oei kăl pham. Tơdrong tơbăt 23 xơnăm năr tôm kon pơlei plang pham ‘mêm kơ-eng jing ‘măng vă tơroi tơbăt hơtŏk hloh dơ̆ng tơdrong ‘lơ̆ng đơ̆ng plang pham dŏng kon bơngai, pơlan xă jâ̆p jang tơdrong plang pham lơ̆m tơpôl kon pơlei: “Adoi hơpơi ‘meh ‘năr âu păng dôm năr đơ̆ng rŏng kơnh, kon pơlei lơ̆m jâ̆p dêh char băt hơdăh tơdrong plang pham âu noh ‘lơ̆ng tơnăp. Lơ̆m khei năr truh nhôn pơtoi tơroi tơbăt găh tơdrong plang pham tơ̆ dêh char vă tơdrong jang plang pham tơ̆ dêh char roi năr roi hơtŏk hloh dơ̆ng”

Adoi ăh blŭng khei 4 âu ki, Jơnŭm pơgơ̆r plang pham ‘mêm kơ-eng dêh char Kon Tum pơgơ̆r Lêh pơtơm Năr akŏm tôm kon pơlei plang pham ‘mêm kơ-eng năr 7/4 hăm hơnăn: “Plang kơtoh pham gĭt – Dŏng tơdrong erih”. Kiơ̆ tơbang ăh lêh pơtơm: lơ̆m dôm xơnăm kơ âu, tơdrong jang plang pham ‘mêm kơ-eng kơ dêh char Kon Tum hlôi tơgop kăp gĭt ăn tơdrong jang vei lăng păng hơtŏk pơ-‘lơ̆ng jơhngơ̆m jăn kon pơlei. Lơ̆m xơnăm 2022 âu ki, jâ̆p dêh char pơgơ̆r đei 34 ‘măng plang pham ‘mêm kơ-eng, iŏk đei hloh 6.800 tơpu pham, đei jơnei hloh 136% pơkăp đơ̆ng Jơnŭm pơgơ̆r jang kơ teh đak găh hơvơn plang pham ‘mêm kơ-eng.

Tơdrong plang pham ‘mêm kơ-eng hlôi lang xă jâ̆p jă apŭng, pơlei tơm păng rim anih jang kơ dêh char Kon Tum jing minh um ai ‘lơ̆ng rŏ lơ̆m tơdrong erih xa. Yă Nguyễn Thị Hoài Ven, Kơdră Anih jang ‘long pơglang brê dêh char, Phŏ kơdră Anih pơgơ̆r jang plang pham ‘mêm kơ-eng dêh char Kon Tum ăn tơbăt: “Xơnăm 2023 Anih jang ‘long pơglang brê dêh char Kon Tum jing anih juăt jang Pơgơ̆r lơ tơdrong jang tih nhen: Tơdrong jang Lêh akŏm puih mak brê, Năr akŏm tôm kon pơlei plang pham ‘mêm kơ-eng, Hơyak brê... Tơchơ̆t kơ xơnăm 2023 gô đei iŏk tŏ xĕt jat noh 7.200 tơpu pham. Kon pơlei dang ei băt hơdăh găh tơdrong plang pham ‘mêm kơ-eng”.

Jơnŭm pơgơ̆r hơvơn plang pham ‘mêm kơ-eng dêh char Kon Tum tơlĕch tơchơ̆t lơ̆m xơnăm 2023 hơvơn đei 1.500 ‘nu bơngai chih măt plang pham ‘mêm kơ-eng păng iŏk đei 7.200 tơpu pham trŏ nhen tơdrong kăl yua pham kơ Hnam pơgang tơm dêh char vă dŏng hơmet jĭ jăn ăn bơngai jĭ. Đơ̆ng rŏng kơ Lêh pơtơm Năr akŏm tôm kon pơlei plang pham ‘mêm kơ-eng năr 7/4, Anih jang ‘long pơglang brê dêh char Kon Tum adoi pơgơ̆r xơng iŏk pham đơ̆ng bơngai plang pham ‘mêm kơ-eng păng lơ̆m khei 4 adrin hơvơn, xơng iŏk 720 tơpu pham.

Kơtă đơ̆ng blŭng xơnăm, tơ̆ pơlei tơm Buôn Ma Thuột, dêh char Đăk Lăk adoi pơtơm Tơdrong jang “ ‘Năr giĕng brê” ‘măng 15 tơ̆ Tây Nguyên. Tơ̆ lêh pơtơm ‘măng mă âu hlôi đei hloh 600 sinh viên, bơngai pơtho, kang ƀô̆ thâi pơgang tŏk bŏk oei hŏk pơhrăm, pơm jang tơ̆ Hnam trưng Đăi hŏk  Y dược Buôn Ma Thuột, dêh char Đăk Lăk vang akŏm plang pham ‘mêm kơ-eng. Pơtôch tơdrong akŏm hlôi iŏk đei hloh 500 tơpu pham, tơgop lơ̆m anih mong pham kơ teh đak. Đei 20 ‘măng plang pham ‘mêm kơ-eng, ‘nhŏng Quốc Đình Khánh, jang Kơdră kih thuơ̆t, Khoa Xet ngĭm, Hnam pơgang Đăi hŏk Y dược Buôn Ma Thuột tơroi: “ ‘Nâu jing minh tơdrong jang kăp gĭt, kăl hloh, ƀenh kơ đon bơnôh kon bơngai, tơgŭm đei lơ bơngai jĭ jăn. Inh adoi jang găh pơgang hơmet jĭ jăn noh inh băt hơdăh tơdrong plang pham gĭt kăl thoi yơ păng ưh đei răm kiơ hăm bơngai plang pham, noh inh adoi hơvơn tôm đe boăl mơlôh mưh pran jăng noh vang akŏm chă plang pham ‘mêm kơ-eng”

Tơdrong jang  “ ‘Năr giĕng brê” ‘măng 15 đei pơgơ̆r tơ̆ 3 anih phara băl tơ̆ Tây Nguyên noh Hnam trưng Đăi hŏk Tây Nguyên, apŭng Cư M’gar păng apŭng  Ea Kar kơ dêh char Đăk Lăk. Hăm tơchơ̆t  “Plang pham dŏng bơngai, tơdrong erih boăl păng inh”, tơdrong jang pơlan xă kơjă kăp gĭt găh đon bơnôh, tơgop pơkŏm lơ̆m anih răk pham kơ teh đak vă tơtom dŏng hơmet jĭ ăn dôm bơngai jĭ jăn.