Sơnăm hŏk ‘nâu, lơ̆m dêh char đei vă jê̆ 500.000 ‘nu hŏk tro rim jăl, lơ̆m noh hŏk tro kon kông iŏk đei truh 35%. Lêh mât hŏk sơnăm hŏk ‘nao 2024-2025 tơ̆ Hnam trưng teh đak rong hŏk tro kon kông Nơ Trang Lơng, plt Buôn Ma Thuột, dêh char Đắk Lắk, hnam trưng chih hơdăh tơdrong tơm ‘nŏh pơm hơtŏk tơdrong ‘lơ̆ng mưh pơtho hŏk pơhrăm.

Mă loi hnam trưng năng kăl păng chă trong jang ‘lơ̆ng hlŏh ăn tơdrong pơtho pơhrăm hăm hnam trưng teh đak rong hŏk tro kon kông ‘nŏh jĭ pơtho găh hơdrĕch kon kông păng tơdrong juăt jŏh ayŏ kơ dŏ xoang kơ hơdrĕch kon kông lơ̆m hnam trưng. Lêh mât hŏk sơnăm hŏk ‘nao 2024-2025, tơ̆ dôm hnam trưng đơ̆ng tơring kơdrâm truh tơ̆ tơring hơtăih yăih, tơring kon kông đei pơgơ̆r hrĕnh, gĭt kăl pơjing đei jơhngâm hưch hanh ăn thây kô păng hŏk tro dêh char Đắk Lắk lơ̆m sơnăm hŏk ‘nao.

Pơgê năr 5/9, hloh 400 rơbâu hŏk tro tơ̆ dêh char Gia Lai hăt hot năm akŏm Lêh pơtơm sơnăm hŏk ‘nao 2024 – 2025. 

Tơ̆ hnam trưng Jăl kơđeh Võ Thị Sáu, pơlei tơm Pleiku, dêh char Gia Lai, Hô̆i đŏng Đô̆i Trung ương (lơ̆m Trung ương Đoan Hơdruh Tơdăm Hồ Chí Minh) hlôi pơtơm hơnăn tơdrong jang Đô̆i păng tơdrong jang hăm đe hơ-ioh sơnăm hŏk 2024-2025 păng asong 526 um la kak Việt Nam atŭm hăm lơ tơmam kăp gĭt ăn đe hŏk tro păng hnam trưng nhen asong 1.000 tŏ kơn chô̆ brê, 13 hla kơ Đô̆i, atŭm hăm lơ tơmam drăm ‘măn hŏk pơhrăm păng anih pơchơt pơhiơ̆ ăn đe hơ-ioh hăm kơjă hloh 256 trĭu hlj. Sơnăm hŏk 2024 – 2025, dêh char Gia Lai đei 759 anih pơtho pơhrăm hăm hloh 400 rơbâu ‘nu hŏk tro tơ̆ dôm jăl hŏk.

Lơ̆m pơgê brei mơ̆n, hlŏh 7.000 ‘nu hŏk tro păng thây kô tơ̆ 29 hnam trưng lơ̆m apŭng Kon Plông, dêh char Kon Tum kŭm pơgơ̆r pơm lêh mât hŏk sơnăm hŏk ‘nao ‘năi. Tơdrong hơiă hlŏh đei tơ̆ rim lăm hŏk đơ̆ng rŏng kơ pơm lêh mât hŏk sơnăm hŏk ‘nao ‘nŏh đe oh hŏk tro đei hơlen năng đon kơchăng, tơjră hăm teh dơdrŏ.

Ƀok thây Lê Văn Đồng, Phŏ Kơdră Anih vei lăng pơtho pơhrăm apŭng Kon Plông, ăn tơbăt, chih hơdăh teh dơdrŏ jĭ tơdrong đei ưh kơ ê, ƀât lăp pơm hiong răm tôch dêh kơna adrol kơ sơnăm hŏk ‘nao 2024-2025, anih pơtho pơhrăm apŭng adrin jang hơdoi hăm dôm anih jang kơpal pơtho tơƀôh trong tơjră hăm teh dơdrŏ ăn đe oh hŏk tro păng khul thây kô.