Kơsơ̆ năr 22-9, tơ̆ Hơnih bơ̆ jang Khul kơdră Teh đak, Thủ tướng Teh đak Phạm Minh Chính pơm tơm ‘măng hop akŏm mă blŭng, Hơnih chĕp pơgơ̆r Trung ương găh trong bơ̆ jang hnam oei păng tơdrong tech răt teh. Thủ tướng athei, pơm hơdăh đei dăh mă ưh tơdrong pơm tŏk jur kơjă tĕch răt teh vă hơmet pơ ‘lơ̆ng, mă kăl kăl tơblang hơdăh kơ yuơ kă kiơ hnam oei akŏm tă kơ măt păng măt hơnơ̆ng...  Kiơ̆ tơbăt tơ̆ hop akŏm, lơ̆m 9 khei ou ki lơ̆m teh đak đei 1.816 tơdrong vă jang hnam oei, hơnih kơdrơ̆m ‘nao đei tơlĕch jang. Tơdrong chă tĕch răt teh, hnam lơ̆m khei năr ou ki đei hloh 430.000 ‘măng; kơjă hnam oei dang ei tŏk bŏk lơ̆m kơjă măt. Tơ̆ hop akŏm, Thủ tướng Phạm Minh Chính pơma hơdăh: trong bơ̆ jang tơgŭm găh hnam oei păng tơdrong tĕch răt teh hnam oei jĭ tơdrong kăl hloh, tơgop pơm hơtŏk tŏk muk drăm, pơm ‘lơ̆ng ăn tơdrong hơrih sa kơ kon pơlei, pơjing đei tơplih ‘nao ăn teh đak. Thủ tướng pơma hơdăh, trong jang tơgŭm djru hnam oei tơpôl, sơđơ̆ng ăn kon pơlei răt păng mơng oei, sơđơ̆ng ăn tơdrong pơm tơm kon bơngai păng sơđơ̆ng hơrih sa jang sa. Thủ tướng pơma hơdăh, trong jang “đĭ đăng kơ yuơ kơ kon pơlei kơ teh đak, kơrŭn đĭ ai, iung jang kơtang, jang tơdrong kiơ keh đang tơdrong ‘noh; pơjao  kăl 6 hơdăh: hơdăh bơngai, hơdăh tơdrong jang, hơdăh jơ ‘năr jang, hơdăh gơh jang, hơdăh hơnăp jang păng hơdăh tơmam jang vă pơjing đei hơyak pran kơtang lơ̆m atŏk tơ iung hnam oei păng tơdrong tĕch răt teh hnam.