Thủ tướng Phạm Minh Chính tơlĕch ăn Hla ar 176 athei jăh mă tơtĕnh hơmet pơ ‘lơ̆ng hiong răm đơ̆ng kial hơbŭt kơsô̆ 10 păng ‘mi tih đak lơ̆p. Truh ‘năr dơ̆ng ‘năr 29/9, ‘mi kial hơbŭt hlôi pơm ăn 11 ‘nu lôch, 13 ‘nu hiong dong, 8 ‘nu ưh kơ đei gơh pơma dơnuh băl, 33 ‘nu rơka, lơ hnam oei, hơnih pơm tơlĕch hư răm tôch kơ dêh. Thủ tướng gơih nơ̆r vang sơ ‘ngon truh ŭnh hnam bơngai răm păng athei Kơdră Anih vei lăng kon pơlei rim dêh char, pơlei tơm ƀơm truh akŏm tơchă dŏng sar bar, tơgŭm ŭnh hnam đei bơngai đei răm, dŏng hơmet đĕch bơngai jĭ rơka, tơtĕnh hơmet ming anih jang kăl nhen trong nơnăm, ŭnh điên, đak, viễn thông. Thủ tướng athei Anih tơm vei lăng Khŭl lĭnh, Kŏng an păng rim khŭl lĭnh đei pơgơ̆r hơvơn lĭnh, kŏng an jang hơdai dŏng tơgŭm, vei sơđơ̆ng ‘lơ̆ng.

Rim anih tơm, anih jang, tơring athei roi tơbăt pơtôch tơ jră ăn kơ Thủ tướng hơdrol 15 jơ rim năr vă hơmet ‘lơ̆ng tơtom dôm tơdrong đei ƀôh. Pơgê 29/9, tơ̆ Nghệ An, Phŏ Thủ tướng Trần Hồng Hà hlôi đei jơ hop akŏm trực tuyến hăm rim tơring pơgơ̆r tơdrong jang hơmet pơ ‘lơ̆ng hiong răm đơ̆ng ‘mi kial hơbŭt. Kiơ̆ roi tơbăt, kial hơbŭt gô pơm ăn ‘mi tôch kơ tih ăn tơring  Thanh Hóa – Hà Tĩnh, tơmăn Bắc Bộ, Phú Thọ. Dang ei đĭ đăng rim đak krong tơ̆ 3 dêh char Thanh Hóa, Hà Tĩnh păng Nghệ An tă kơ hơtŏk kơsô̆ roi tơbăt krê hơmơt 3 kơna rim tơring kăl akŏm tơ jră hăm đak lơ̆p.