Tơroi tơbăt tơ̆ jơ bơ̆ jang đei ƀôh, 4 khei blung sơnăm 2023 akŏp thuê̆ ăn hơnih mong jên bơ̆ jang teh đak lơ̆m pơlei tơm ‘nŏh vă jê̆ 178.000 ti hlak jên, jơnei hloh 50% trong tơlĕch jang, tŏk 21,6% pơtêng hăm khei au sơnăm sơ̆. Hà Nội dơ̆ng mă 2 lơ̆m teh đak găh hơvơn FDI hăm hloh 7.000 tơdrong vă jang đei đei iung jang păng kon jên tơmơ̆t jang 61 ti 700 triu dolar.

Iung pơma pơtôch jơ bơ̆ jang, Thủ tướng Teh đak Phạm Minh Chính athei lơ̆m khei năr kơnh, Pơlei tơm hơnơ̆ng tơlĕch jang kiơ̆ ‘lơ̆ng Tơdrong tơchơ̆t Pơm lêh hop akŏm mă XIII kơ Đảng, tơlĕch jang rim tơdrong tơchơ̆t, nơ̆r athei jang kiơ̆ đơ̆ng Hơnih tơm Chinh trĭ găh atŏk tơ iung tơring Tơmăn đak krông Hồng, Hơnih tơm Hà Nội. Kiơ̆ yok rok jơ̆ng kơtang jơhngơ̆m đon iung jang kơdih, tơgoăt tơgoăl dih băl kơjăp, hơbĕch hơbal, tơchăr hơgei, hơvơn jơnei tôm tơdrong jang. Pơjing đơ̆ng ưh jing đei, pơjing đơ̆ng tơnap jing ƀônh, pơjing đơ̆ng ưh kơ kĕ jing kĕ; pơgĕng iung jang dôm tơdrong kăl, tơdrong rơvơn, atŏk tơ iung kơtang hăm jơhngơ̆m đon đơ̆ng kơdih.