Đơ̆ng rŏng kơ lêh sơng, 2 kơdră chĕp kơ̆l khŭl gĭt kăl 2 teh đak pơgơ̆r pơma đam vă pơtrŭt jang hơdai 2 pang. Việt Nam păng Campuchia pơjing tơdrong pơvei jang tơbôl đơ̆ng sơnăm 1967 păng pơvei hơnơ̆ng dôm tơdrong jang pơma dơnuh đơ̆ng khŭl, tơƀơ̆p pơma dơnuh kơdră kơpal. Jang hơdai khŭl lĭnh - sơđơ̆ng hơnơ̆ng jing tơdrong tơm gĭt kăl, lơ̆m noh 2 păh pơma dơnuh ưh kơ lê̆ khŭl lĭnh hơyơ iŏk yua hơgăt teh kơ teh đak kơdih pơm pơrăm truh tơdrong sơđơ̆ng kơ teh đak to.

Jang hơdai mŭk drăm, tĕch mơdro, tơmơ̆t jên jang păng chă tơmang lăng hơnơ̆ng tŏk ‘lơ̆ng. Sơnăm 2025, jên tĕch mơdro 2 pang đei 11,33 ti USD; 4 khei blŭng sơnăm 2026 đei vă jê̆ 5 ti USD, tŏk 9,6% pơting hăm khei ‘nâu sơnăm hơdrol. 2 teh đak tŏk bŏk jang hơdai bơ̆jang tơdrong hơgăt hơtŏk jên tĕch mơdro tŏk 20 ti USD tơ̆ hơnăp kơnh, hơdai hăm hơnơ̆ng pơtrŭt tơƀơ̆p pơma dơnuh đơ̆ng kon pơlei păng jang hơdai chă tơmang lăng.