‘Nâu jĭ ‘măng năm ngôi mă blŭng ‘ngoăih kơ châu Âu đơ̆ng Thủ tướng Luxembourg lơ̆m sơnăm 2023, hơdai hăm kŭm jing ‘măng năm ngôi tơ̆ Việt Nam mă blŭng đơ̆ng Thủ tướng Luxembourg lơ̆m hloh 20 sơnăm âu ki. Pơgê 4/5, lêh sơng Thủ tướng teh đak Luxembourg Xavier Bettel pơgơ̆r tih tơ̆ Hà Nội. Đơ̆ng rŏng ‘noh, 2 Thủ tướng pơma dơnuh dôm hơyak hơtŏk tơiung ‘nao lơ̆m tơdrong pơvei 2 pang. Tơ̆ pơma đam, Thủ tướng Phạm Minh Chính pơma hơdăh lăng kăl tơdrong pơvei tơbôl păng jang hơdai lơ tơdrong hăm Luxembourg.  

2 Thủ tướng hlôi pơma dơnuh găh tơdrong mŭk drăm - tơpôl 2 teh đak, tơdrong pơvei 2 pang păng dôm tơdrong lơ̆m tơring, apŭng plĕnh teh vang bơngơ̆t truh. 2 Thủ tướng drơ̆ng nơ̆r găh dôm trong jang vă tŭn pran tơdrong pơvei tơbôl păng jang hơdai lơ tơdrong đơ̆ng 2 teh đak, mă loi ‘noh jĭ hơtŏk loi dơ̆ng pơma dơnuh đơ̆ng dôm kơdră, mă loi ‘noh kơdră gĭt kăl kŭm nhen tơlĕch jang kiơ̆ đei yua dôm trong jang hơdai 2 pang kŭm nhen tơchĕng hơlen pơjing dôm trong jang hơdai nao hăm tơmam ‘lơ̆ng, ‘meh vă jang hơdai, hơtŏk tơiung đơ̆ng 2 teh đak.