Kiơ̆ tơroi tơbăt, Jăl khei mă I sơnăm ‘nâu, tơdrong mŭk drăm tơpôl dêh char Thừa Thiên Huế hơnơ̆ng đei lơ hơnih hơdăh ‘lơ̆ng, lơ̆m noh akŏp jên tơmơ̆t jang lơ̆m tơpôl pơ hlom iŏk đei dang 5 rơbâu ti hlak jên, tŏk hloh 9 % pơtêng hăm khei ‘nâu sơnăm sơ̆. Thu mong jên jang teh đak tŏk 3,5%. Thủ tướng Phạm Minh Chính pôk pơ ư tơdrong hơdrin păng pơtôch iŏk đei jơnei đơ̆ng Đảng bộ, khŭl kơdră, lĭnh păng kon pơlei dêh char Thừa Thiên Huế, tơgop gĭt kăl lơ̆m jơnei atŭm kơ teh đak.

Tơ̆ hơnăp kơnh Thủ tướng athei, vei kơjăp, tơlĕch jang đei yua tơdrong tơchơ̆t Hop akŏm XIII đơ̆ng Đảng, tơchơ̆t hop akŏm Đảng bộ dêh char. Jĭ tơring đei lơ tơmam hơtŏk tơiung, mă loi ‘noh jĭ găh mŭk drăm đak dơ sĭ, tơmang lăng joh ayŏ jơhnơr arih - cham char bri brăh, dêh char athei lăng kăl hơtŏk tơiung dang ăi mŭk drăm - joh ayŏ - tơpôl păng vei lăng cham char bri brăh tơklep hăm vei sơđơ̆ng teh đak, sơđơ̆ng tơpôl; lăng kăl tơdrong jang pơ jing Đảng păng pơ jing tơdrong jang anih jang hành chính mĭnh jơ hngơ̆m đon, drơ̆ng 1 nơ̆r, tơpăt, kon pơlei pơm tơm, đei yua.