‘Năr 12/9, hơnơ̆ng chă dăr lăng tơdrong hiong răm đơ̆ng ‘mi tih đak tơjroh, Thủ tướng Phạm Minh Chính ưh kĕ gơ̆t đak măt mưh truh tơ̆ plei Nủ, xăh Phúc Khánh apŭng Bảo Yên, dêh char Lào Cai. Kiơ̆ hla ar chih tơroi, dêh char Lào Cai đei 6/9 apŭng, thĭ xăh, plt đei bơngai lôch. Akŏm đĭ đăng kơsô̆ bơngai răm ‘nŏh 255 ‘nu, lơ̆m noh đei 98 ‘nu bơngai lôch; 81 ‘nu bơngai hiong hơkâu, 76 ‘nu bơngai rơka.  Hơdrô̆ tơ̆ plei Nủ - xăh Phúc Khánh – apŭng Bảo Yên đĭ chă ƀôh 44 ‘nu bơngai lôch.

Thủ tướng ĕnh jơhngâm ơh, jur tơ̆ teh dơ̆k, anih teh oei kơlơ̆p tĭt kon pơlei, kŭm hăm khul linh, công an vang chă hơkâu bơngai lôch răm păng roi tơƀôh trong chă dŏng bơngai răm hăm khul jang dŏng tơgŭm. Bơ̆ jang hăm khul kơdră tơring, Thủ tướng čhưu jơhngâm pơtruh nơ̆r sơ ‘ngon hăm dôm bơngai răm. Thủ tướng athei akŏm khul jang chơ chă 51 ‘nu bơngai oei hiong hơkâu, hăm dôm bơngai rơka athei hơmet mă ‘lơ̆ng. Athei kôch hơmet teh vĭ, hơmet rơgŏh cham char tang găn tơdrong jĭ jăn, pơm hơmet trong nơnăm. Thủ tướng athei Mặt trận tổ quốc, dôm khul tơpôl pơngơ̆t ăn kon pơlei tơ̆ âu mă tơtom; bơnê kơ khul linh ƀô đô̆i, công an tơtom truh tơgŭm ăn kon pơlei tơ̆ âu.