Tơchĕng ‘lơ̆ng tơdrong adrin, đon jang tơnăp, tơdrong hơmet tôch ‘lơ̆ng đơ̆ng Anih tơm vei lăng jên hu, dôm nơ̆r pơma tơpăt ‘lơ̆ng, trŏ ƀlep tơ̆ hop akŏm, Thủ tướng pơma hơdăh đon adrin hơmet pơ ‘lơ̆ng dôm tơdrong oei tơhlăk tơ̆ hla ar chih hơgăt luơ̆t; athei Anih tơm vei lăng jên hu tơgŭm jơnăr, khul jang, pơjao hơdăh ăn đe ƀok kơdră vei lăng păng pơtruh kăn ƀô̆ gơh hơgei, đei đon tơnăp bơ̆ jang tơdrong ‘nâu.

Găh tơdrong chih hơmet ming, Thủ tướng drơ̆ng nơ̆r hăm nơ̆r apinh đơ̆ng Anih tơm vei lăng jên hu găh chih hơmet ming 7 kơ luơ̆t ƀơm truh jên hu, athei hơnơ̆ng hơlen năng vă sek tơlang tơpăt dôm tơdrong tơhlăk tih, đơ̆ng noh vang hơmet pơ ‘lơ̆ng dôm tơdrong pơmat tat lơ̆m tơdrong jang xa, tĕch mơdro, hơtŏk tơdrong jang mŭk drăm, vei lăng ‘lơ̆ng kơjă tơmam păng pơm sơđơ̆ng ăn mŭk drăm lơ̆m teh đak, pơm ‘lơ̆ng ăn dôm tơdrong jang tih găh mŭk drăm păng iŏk yoa ‘lơ̆ng rim kơsô̆ jên, tơmam drăm pơyoa ăn tơdrong jang tŏk, bơ̆ jang đei jơnei dôm tơdrong hơgăt, tơdrong vă jang mă Hop akŏm XIII kơ Đảng hlôi tơlĕch.