Pơma ah lêh tơbăt, Thủ tướng pôk bơnê, păng thơ thâu hăm dôm tơdrong mă anih jang Hoă chơ̆t đei iŏk jơnei lơ̆m tơdrong pơjing păng hơtŏk lơ̆m 55 sơnăm kơ âu. Thủ tướng ră hơdah, lơ̆m tơdrong jang kiơ̆ kŏng ngĭp ‘nao hơgei noh anih jang Hoă chơ̆t jing anih jang kŏng ngĭp dơnơm, kơyuơ noh Anih jang Hoă chơ̆t Việt Nam pơkăl athei hơtŏk tơ-iung.

‘Nâu jing sơnong jang kăp gĭt hăm Đảng, Teh đak păng kon pơlei. Thủ tướng pơkăl khei năr truh, Anih jang Hoă chơ̆t Việt Nam athei tơguăt tơguăl mă tơpă; tôm noh athei jang ăn tơdrong pơyua kơ teh đak, kơ kon pơlei mă tơm; kơchăng jang kơjăp, đei jơnei hăm rim anih jang, rim tơring hăm dih băl; kơchăng asong jang, iŏk yua trong hiôk vă hơtŏk tơ-iung jơk, tơplih kơsô̆, tơplih jơk, hơtŏk jang unh hơyuh sơđơ̆ng ‘lơ̆ng.