‘Năr dơ̆ng ‘năr 4/5, tơ̆ Anih jang kơ Khul kơdră tĕh đak, đơ̆ng rŏng kơ lêh sơng păng pơma đam tơpă, Thủ tướng Phạm Minh Chính păng Thủ tướng tĕh đak Luxembourg Xavier Bettel dơ̆ng lăng tơdrong kĭ pơkăp lơ hla ar jang hơdoi păng tơƀâp bơngai chih hla ar tơroi vă roi tơbăt dôm tơdrong iŏk đei lơ̆m jơ pơma đam đơ̆ng 2 Thủ tướng.

Tơ̆ jơ tơƀâp bơngai chih hla ar tơroi, Thủ tướng Phạm Minh Chính ăn tơbăt, 2 ‘nu kơdră chĕp kơ̆l ‘nao đei jơ pơma đam tơpăt ‘lơ̆ng, đei yoa, lui băl, vang pơma nuh găh lơ tơdrong vă jang hơdoi, ‘moi kiơ̆ tơdrong pơvei 2 pang kŭm nhen lơ pang. Thủ tướng Xavier Bettel ăn tơbăt, Luxembourg ling lang yak hơdoi hăm Việt Nam jô̆ hloi lơ̆m khei ‘năr pơmat tat dăh mă hiôk hian, jang tŏk pran; hơpơi ‘mĕh păng lui đơ̆ng rŏng ‘măng năm hơpong âu tơdrong pơvei kơ 2 tĕh đak gô tŏk ‘lơ̆ng hlŏh dơ̆ng, roi đei yoa hlŏh dơ̆ng.

Thủ tướng Xavier Bettel ăn tơbăt, 2 păh drơ̆ng nơ̆r hơtŏk tơdrong jang hơdoi mưh sek tơlang dôm tơdrong lơ̆m plei tĕh, lơ̆m nŏh kăl hlŏh jĭ tơjră păng arih xa, bơ̆ jang ‘moi kiơ̆ tŏ ‘mi kial tơplih. Lơ̆m kơsơ̆ ‘năr 4/5, 2 Thủ tướng năm tơmang lăng tơ̆ Văn Miếu – Quốc Tử Giám păng Anih ‘măn răk tơmam chih čhơ̆ Việt Nam.