Trong gre kơdâu hrĕnh Ninh Bình - Nam Định - Thái Bình kơjung dang 88km. Tơdrong jang man trong gre Gia Nghĩa (Dak Nông) – Chơn Thành (Bình Phước) kơjung hlŏh 128 km. Găh 2 tơdrong jang ‘nâu, Anih tơm vei lăng trong nơnăm pơma hơdăh, tơdrong tơlĕch jên man trong ‘nŏh tôch gĭt kăl, vei lăng ‘lơ̆ng tơdrong sơđơ̆ng tĕh đak, sơđơ̆ng tơ̆ tơring tĕh tơmăn đak krong Hồng, tơring Đông Nam Bộ tơƀưh hăm Tây Nguyên.

Pơma tơ̆ hop akŏm, Thủ tướng Phạm Minh Chính akhan, trong gre kơdâu hrĕnh tơƀưh Ninh Bình – Nam Định – Thái Bình gô tơguăt Hải Phòng, Quảng Ninh pơjing đei tơdrong ‘lơ̆ng vă jang tŏk ‘nao păng pơih trong jang tŏk ăn jơ̆p tơ ring; trong đơ̆ng Đắk Nông năm tơ̆ Bình Phước ‘nŏh jĭ trong kơđĕh hlŏh vă lĕch tơ̆ tơnŏk duk tơ̆ Vũng Tàu, trong gĭt kăl đơ̆ng Tây Nguyên năm tơ̆ Đông Nam Bộ pơjing tơdrong ‘lơ̆ng vă jang tŏk ăn jơ̆p tơring. Thủ tướng athei dôm bơngai tang măt tơlĕch nơ̆r pơma lăng năng hlôi jang đei yă kiơ, tơhlăk ƀât yơ, atŭm hăm ‘nŏh pơma hơdăh, athei đei đon adrin tôch ai, trong jang mă rơđăh păng pơgơ̆r bơ̆jang mă ‘lơ̆ng, kiơ̆ đơ̆ng noh, dôm anih jang athei adrin bơ̆ jang hăm jơhngâm đon năng tơdrong đei yoa atŭm kăl hlŏh.