Pơma lơ̆m hop akŏm, Thủ tướng Phạm Minh Chính pơma hơdăh, hơmet ming trong pơm hla ar ‘nŏh jĭ 1 lơ̆m 03 tơdrong jang tơm gĭt kăl, đei Đảng, Tĕh đak tôch năng kăl, chĕp kơ̆l pơgơ̆r jang tôch pơnĕh. Thủ tướng athei dôm bơngai tang măt pơma tơpăt tơdrong, pơma kơđĕh, trŏ tơdrong kăl, vă gơ̆h bơ̆ jang ‘lơ̆ng, hơlen năng, pơm hơdăh dôm tơdrong iŏk đei, dôm tơdrong tam mă pran ‘lơ̆ng, kơlih yoa kiơ, ƀai hŏk kăl vă pơgơ̆r hơmet ming trong pơm hla ar hăm kơmăy sô̆ pơvih ăn kon pơlei, anih tĕch mơdro păng tơlĕch trong hơmet pơ ‘lơ̆ng, sek tơlang dôm tơdrong oei tơhlăk, găn trong mưh pơgơ̆r bơ̆ jang. Atŭm hăm ‘nŏh, hơlen năng tôm tơdrong jang đei mưh hơmet ming trong pơm hla ar pơma atŭm păng tơlĕch dôm tơdrong jang kăl, trong jang mă rơđăh vă tưk tơiung tơdrong jang ‘nâu tơ̆ hơnăp kơnh.