Pơgê 20/4, Hop akŏm roi tơbăt păng tơlĕch tơdrong Tơproh trong jang atŭm kơ tĕh đak đơ̆ng 2021 – 2030, trong vă jang truh sơnăm 2050, hăm hơnăn “Đon tơchĕng ‘nao – Trong jang plơ̆ng – tơdrong ‘lơ̆ng hle – kơjă kăp gĭt ‘nao” đei pơgơ̆r hăm tơdrong pơgơ̆r đơ̆ng Thủ tướng Phạm Minh Chính. Hop akŏm đei pơgơ̆r kiơ̆ trong trư̆k tuyê̆n tơ̆ anih pơih pơdăh tơm ‘nŏh jĭ Anih jang kơ Khul kơdră tĕh đak păng 63 dêh char, plt găh Trung ương.

Pơma tơ̆ hop akŏm, Thủ tướng Phạm Minh Chính pơma hơdăh, tơprŏh trong jang atŭm kơ tĕh đak ‘nŏh jĭ tơdrong jang chinh trĭ tôch gĭt kăl, đunh đai, kŭm jing tơdrong tôch tih, tôch ‘nao, tôch mơmat păng đơ̆ng sơ̆ tam mă biơh đei”. ‘Nâu jĭ tơdrong tôch kăl hăm luơ̆t vă tơgŭm ăn tĕh đak tơlĕch trong jang, akŏm jơhngâm bơ̆ jang, atŏk tơiung, vă gơ̆h jang hrơ̆ch ‘lơ̆ng đơ̆ng tơproh trong jang kơ tĕh đak hăm tơproh trong jang tơ̆ tơring păng dêh char, vă iŏk yoa tôch đa tơdrong pran ‘lơ̆ng đơ̆ng tĕh đak pơyoa ăn tơdrong jang atŏk tơiung mŭk drăm, tơpôl hrĕnh păng kơjăp. Thủ tướng athei rim anih jang kơpal akŏm jơhngâm chĕp kơ̆l pơgơ̆r bơ̆ jang hrơ̆ch ‘lơ̆ng, đei yoa 10 trong jang, klăih song mă hơdăh tơdrong jang vă pơ ‘nhŏ jên jang hơdrol, khŏm bơ̆ jang ‘lơ̆ng tơdrong jang ‘nâu.