Pơma tơ̆ hop akŏm, Thủ tướng Phạm Minh Chính akhan, Tây Nguyên jĭ tơring tôch gĭt kăl găh mŭk drăm, chinh trĭ, vei sơđơ̆ng teh đak păng cham char bri brăh ‘lơ̆ng rŏ kơ teh đak. Đảng, Teh đak, dôm ƀok Tổng Bí thư lơ̆m rim chăl hơnơ̆ng ‘măn jơhngâm đon tơrek tôch dêh hăm tơdrong jang tŏk păng vei sơđơ̆ng ăn Tây Nguyên; hlôi tơlĕch lơ tơdrong tơchơ̆t, ‘nao âu hlŏh jĭ tơdrong tơchơ̆t kơsô̆ 23 đơ̆ng Anih tơm Chinh trĭ găh “Trong jang atŏk tơiung mŭk drăm – tơpôl păng vei sơđơ̆ng teh đak tơ̆ tơring Tây Nguyên truh sơnăm 2030, trong vă jang truh sơnăm 2045".

Hăm jơhngâm đon “Jơ̆p lơ̆m teh đak yoa Tây Nguyên; Tây Nguyên adrin tŏk klăih đơ̆ng pơmat tat yak tŏk hơdai hăm teh đak”, Thủ tướng teh đak hơpơi ‘mĕh păng lui, Đảng ƀô̆, khul kơdră pơgơ̆r, khul linh păng kon pơlei dôm dêh char Tây Nguyên, vang akŏm jơhngâm jang, khŏm tŏk klăih đơ̆ng pơmat tat, pơlong nol, pơjing hơyak tŏk pran lơ̆m tơdrong jang mŭk drăm, tơpôl, khŏm bơ̆ jang kĕh ‘lơ̆ng tơdrong jang vei lăng kơjăp ‘lơ̆ng tơdrong sơđơ̆ng tơ̆ hơnăp kơnh.