Năm hơlen tơ̆ tơring iŏk hrŭ teh tơmăn ming man, Thủ tướng Phạm Minh Chính ră hơdah, âu jing jăl trong tơm dơnơm, kăp gĭt vă pơtoi tơring Tây Nguyên, Đông Nam Bộ, cham gre păr Long Thành păng lơ jăl trong tih, dơnŏk duk... Thủ tướng pơgơ̆r jang hăm 2 dêh char Bình Dương, Bình Phước jang hadoi kơjăp, tơgŭm dih băl vă đah hơtŏk tenh tơdrong ming man, lơ̆m noh jăl trong găn dêh char Bình Phước hơdrô̆ 7 km kiơ̆ pơkăp asong jang đơ̆ng teh đak noh athei tenh kuăng tơlĕch jang, keh đang hrôih.

Thủ tướng tơchơ̆t asong anih hơlen trong kơdâu hrenh mă trŏ ƀlep, tenh kuăng pơkăp vă dah iŏk yua kơjăp hloh tơdrong hơtŏk ming man ‘nao đơ̆ng jăl trong tih, hơtŏk dôm anih jang kŏng ngĭp, tĕch pơdro, hơtŏk tơring kơdrơ̆m ‘nao hăm dôm tơdrong jang khua hŏk kŏng ngê̆, tơplih ‘nao gơh hơgei, hơtŏk jang mŭk drăm kơsô̆, mŭk drăm jơk, mŭk drăm jang hadoi lơ̆m dôm anih jang kŏng ngĭp.