Đơ̆ng rŏng kơ mơ̆ng dôm nơ̆r pơma, Thủ tướng Phạm Minh Chính tơchĕng ‘lơ̆ng nơ̆r pơma tơpăt ‘lơ̆ng, lăp hăm yăn âu, tôch đei yoa đơ̆ng dôm Phó Thủ tướng păng dôm bơngai tang măt vang truh hop akŏm. Mă loi jĭ, hôn bơnê jơhngâm đon tơnăp, pơ̆n tơchĕng, pơ̆n bơ̆ jang đơ̆ng anih ming man vang truh Hop akŏm, hlôi tơlĕch lơ trong jang tôch ‘lơ̆ng, tơplih ‘nao gơ̆h hơgei vang sek tơlang dôm tơdrong tih lơ̆m teh đak.

Thủ tướng pơjao ăn Anih pơvih ăn Khul kơdră teh đak pơgơ̆r, jang hơdoi hăm Anih tơm ming man păng dôm anih tơm, anih jang kơpal đei ƀơm truh chih iŏk tôm nơ̆r pơma, tơlĕch tơdrong tơchơ̆t đơ̆ng Hop akŏm vă gơ̆h drơ̆ng nơ̆r ăn trong pơgơ̆r bơ̆ jang. Tơ̆ hơnăp kơnh Thủ tướng athei, kơdră chĕp kơ̆l dôm anih tơm, anih jang kơpal, tơring tơrang, dôm anih ming man chih hơdăh, tơdrong tơlĕch jang dôm tơdrong jang gĭt kăl, tơdrong jang tih kơ teh đak đei yoa ‘lơ̆ng, trŏ khei ‘năr hơgăt, trŏ tơdrong pơhnŏng đei tơlĕch ‘nŏh jĭ jơhngâm pran vă jang đei tơdrong jang hăm kơmăy kơmŏk ‘nao kơ teh đak.