‘Năr brei (16/9) tơ̆ Anih jang Khŭl kơdră teh đak, Thủ tướng Phạm Minh Chính hlôi pơgơ̆r ‘măng hop akŏm hăm Kơdră chĕp kơ̆l dôm anih tơm, anih jang ƀơm truh, năm jrŭ hơlen lăng tơdrong tơlĕch jang Tơdrong tơchơ̆t 36 găh Tơdrong jang hơtŏk tơiung mŭk drăm đak dơsĭ Việt Nam truh sơnăm 2030, lăng truh sơnăm 2045 păng dôm tơdrong ƀơm truh lơ̆m Tơdrong tơchơ̆t Hop akŏm XIII kơ Đảng.

Kiơ̆ lơ̆m tơblang hơdăh gĭt kăl, tôm tơdrong apŭng plĕnh teh, tơring păng Biển Đông kŭm nhen ‘meh vă hơtŏk tơiung kơ teh đak lơ̆m tơdrong ‘nao, Thủ tướng Phạm Minh Chính athei dôm anih tơm, anih jang păng tơring ƀơm truh tơ̆ hơnăp kơnh hơnơ̆ng jang kiơ̆ trong jang đơ̆ng Đảng, tơdrong tơgŭm khôi luơ̆t đơ̆ng teh đak, lơ̆m noh đei Tơdrong tơchơ̆t Hop akŏm XIII kơ Đảng, Tơdrong tơchơ̆t 36 găh Tơdrong jang hơtŏk tơiung kơjăp mŭk drăm đak dơsĭ Việt Nam truh sơnăm 2030, lăng truh sơnăm 2045; Tơdrong tơchơ̆t 44 găh Tơdrong jang vei lăng Teh đak lơ̆m tơdrong ‘nao, kơchăng, hơdrin, tơlĕch jang đei yua dôm tơdrong jang, iŏk đei jơnei ‘nao gĭt kăl, tơpă hloh dơ̆ng lơ̆m rim tơdrong.