‘Nâu jĭ ‘măng hop akŏm Khŭl kơdră teh đak kiơ̆ tơdrong jang chih pơjing khôi luơ̆t mă 2 lơ̆m khei 9 păng jing ‘măng hop akŏm mă 10 lơ̆m sơnăm 2024 pơma dơnuh găh lơ tơdrong gĭt kăl. Pơma pơih blŭng ‘măng hop akŏm, Thủ tướng Phạm Minh Chính tơƀôh rơđăh, chih pơjing khôi luơ̆t, trong chĕp kơ̆l pơgơ̆r khôi luơ̆t ‘noh jĭ 1 lơ̆m 3 tơdrong jang tơm gĭt kăl, pơjing trong chĕp kơ̆l pơgơ̆r jang ‘noh jĭ jơhngơ̆m pran ăn tơdrong hơtŏk tơiung.

Thủ tướng Teh đak athei dôm bơngai jang lơ̆m Khŭl kơdră teh đak, dôm kơdră tơm, kơdră anih jang kơtă pơgơ̆r tơdrong jang pơjing khôi luơ̆t; tơgŭm hơdrol bơngai jang, anih jang tơmam drăm, jên hu ăn tơdrong jang chih pơjing khôi luơ̆t; hơtŏk ‘lơ̆ng jơhngơ̆m đon jang tơnăp, akŏm jang tơpăt, ki luơ̆t; jang kơjăp, ưh kơ gơh veh ver, tơtŭn băl hơnăp jang; ƀơ̆t măt pơyua ‘lơ̆ng ‘Măng hop akŏm mă 8, Quốc hội jăl XV.