Kơsơ̆ năr 23/9, Thủ tướng Phạm Minh Chính pơgơ̆r 'Măng hop akŏm mă 14 kơ Jơnŭm pơgơ̆r jang kơ teh đak gah tơjră chă rôp you ka glăi (IUU). Đơ̆ng rŏng jê̆ 8 sơnăm tơlĕch jang, lơ trong tơlĕch jang đei jơnei kăp gĭt mă lei Việt Nam oei tam mă đei Anih jang châu Âu (EC) pơih lê̆ pơkăp “The dreng”. Tơdrong tơm noh jing tơdrong vei hơlen duk rôp you ka tam mă kơjăp, tơdrong chă rôp you ka tơ̆ tơring đak dơsĭ teh đak đe oei đei, mă kăl tơ̆ minh ƀar tơring tơjih đak dơsĭ.

Thủ tướng ră hơdah, tơchơ̆t kăl hloh noh akŏm pơih lê̆ “The dreng”, vei lăng tơdrong 'lơ̆ng kơ teh đak păng pơtoi tơdrong jang đei jơnei kơjăp đunh khei năr.  Ƀok pơgơ̆r hăm dôm jăl jang, mă kăl noh hăm đe kơdră kơpal kơ anih jang, hơtŏk vei lăng, tơplih kơtang đơ̆ng rôp you ka tơ̆ hơtaih vă rong ka hơdang tơjih đak dơsĭ, pơm jang gah ka hơdang vei sơđơ̆ng tơdrong pơyua ăn kon pơlei jang rôp you ka hơdang păng tơgop hơtŏk tơdrong jang ka hơdang tơguăt hăm vei lăng sơđơ̆ng tơdrong pơgơ̆r tơring đak dơsĭ, achon teh, hơtŏk tơdrong pơm jang kơ Việt Nam lơ̆m apŭng plenh teh.