Pơgê năr 3/4, tơ̆ Hơnih jang Khul kơdră Teh đak, Thủ tướng Phạm Minh Chính pơm tơm Hop akŏm trư̆k tuyên Khul kơdră teh đak hăm tơring khei 3/2023 vă lăng hơlen dơ̆ng tơdrong tơlĕch jang kiơ̆ Nơ̆r pơma pơtôch đơ̆ng Trung ương, Tơdrong tơchơ̆t kơ Kuô̆k hô̆i, mă kăl ‘nŏh pơma dơnuh găh tơdrong mŭk drăm-tơpôl khei 3 păng 3 khei sơnăm 2023, tơdrong tơlĕch jang kiơ̆ Tơdrong tơchơ̆t 01 đơ̆ng Khul kơdră Teh đak; tơdrong klăh asong, tơlĕch kon jên jang teh đak.

Găh trong bơ̆ jang lơ̆m khei năr kơnh, Thủ tướng athei tơlĕch jang kiơ̆ ‘lơ̆ng, keh kong rim tơdrong tơchơ̆t, nơ̆r pơma pơtôch đơ̆ng Trung ương Đảng, Hơnih tơm Chinh trĭ, Ban Bí thư, Kơdră chĕp pơgơ̆r tơm dơnơm, Kuô̆k hô̆i, Khul kơdră Teh đak, Thủ tướng Teh đak. Sơđơ̆ng ‘lơ̆ng, jang keh đang trong tơlĕch ăn rim tơdrong vă jang pơtruh ăn Hop akŏm Trung ương 7 păng ‘Măng hop akŏm mă 5 Kuô̆k hô̆i jăl XV. Hơnơ̆ng tơlĕch jang hơdrol vei kơjăp tơdrong atŏk mŭk drăm, tang găn kơ jă tŏk jur, pơtrŭt kơtang atŏk tơ iung, sơđơ̆ng rim tơdrong tơm. Atŏk kơtang jang pơm tơlĕch tĕch mơdro; pơjing tơdrong jang, tơdrong erih sa ăn kon pơlei.