Kơmăng brei 29/09, tơ̆ anih bơ̆jang Khŭl kơdră teh đak, ƀlep ƀơ̆t tơbăt 50 sơnăm pơjing tơdrong pơvei jang tơbôl đơ̆ng 2 teh đak (1975–2025), Thủ tướng Phạm Minh Chính hlôi đei jơ pơma điên thoăi hăm Thủ tướng Cộng hòa Liên bang Đức Friedrich Merz pơma dơnuh dôm trong jang pơtrŭt pơvei Jang hơdai gĭt kăl Việt Nam – Đức hơtŏk tơiung roi ‘năr roi tơpă, đei yua păg tôm tơdrong. Tơ̆ jơ pơma điên thoăi, Thủ tướng Phạm Minh Chính athei Đức hơnơ̆ng hơtŏk tơiung đei yua Tơdrong tơchơ̆t Tĕch mơdro hiôk hian Việt Nam – EU (EVFTA), jăh kĭ ăn Tơdrong tơchơ̆t vei lăng tơgŭm tơmơ̆t jên jang Việt Nam – EU (EVIPA), pơm tơdrong hiôk ‘lơ̆ng hloh ăn rim anih mơdro sa 2 teh đak pơih să jang hơdai tơmơ̆t jên jang păng tĕch mơdro; hơnhăk khoa hŏk kơmăy kơmŏk păng tơplih ‘nao pơcheh hơgei jing 1 tơdrong jang tơm ‘nao lơ̆m jang hơdai 2 pang.

2 păh drơ̆ng nơ̆r jăh hơtŏk tơdrong pơvei 2 pang tŏk kơsô̆ kơjung hloh, hơnơ̆ng hơtŏk loi dơ̆ng pơma dơnuh khŭl kơdră kơpal, hơtŏk đei yua rim trong jang hơdai dang ei đei, pơtrŭt pơjing rim grŭp bơ̆jang hơdai lơ̆m rim tơdrong jang mŭk drăm, chĭnh trĭ, bơ̆jang.