Tơ̆ hơnăp tơdrong hiong răm tôch lơ đơ̆ng ‘mi kial kơsô̆ 3, Tổng Bí thư, Kơdră teh đak Lào Thongloun Sisoulith pơtruh nơ̆r jet gia ‘lơ̆ng hơiă hăm kon pơlei Việt Nam ‘nhŏng oh, mă loi jĭ hăm dôm tơring păng kon pơlei pŭ răm đơ̆ng ‘mi kial hơbŭt âu.

Tơ̆ jơ pơma nuh, Thủ tướng Phạm Minh Chính pơma hơdăh ‘măng năm hơpong tơ̆ Việt Nam đơ̆ng ƀok Tổng Bí thư, Kơdră teh đak Lào tôch gĭt kăl, jĭ 1 lơ̆m dôm tơdrong tơbăt ‘lơ̆ng hơiă lơ̆m tơdrong pơvei đơ̆ng 2 teh đak, vang tơgop tưk tơiung tơdrong pơvei gĭt kăl Việt Nam - Lào roi đunh roi ‘lơ̆ng hơiă hlŏh dơ̆ng. 2 ‘nu ƀok kơdră drơ̆ng nơ̆r găh trong jang hơdoi tơ̆ hơnăp kơnh lơ̆m dôm tơdrong jang, lơ̆m noh pơma hơdăh hơnơ̆ng hơtŏk tơdrong jang hơdoi kơjăp ‘lơ̆ng kiơ̆ dôm tơdrong đơ̆ng nơ̆r đơ̆ng kơdră chĕp kơ̆l, kiơ̆ tơdrong pơkăp đơ̆ng Hop akŏm mă 46 kơ Anih jang hơdoi 2 Khul kơdră teh đak Việt Nam – Lào, kiơ̆ ‘măng năm hơpong tơ̆ teh đak Lào đơ̆ng ƀok Kơdră teh đak Tô Lâm, kŭm nhen dôm tơdrong jang hơdoi đơ̆ng dôm anih jang kơpal, tơring tơrang kơ 2 teh đak.