Thủ tướng pơma hơdăh, tơdrong jang pơting dih băl păng pôk hơpăh ‘noh jơhngơ̆m pran kơ teh đak kơna pơgơ̆r jang kiơ̆ mă ‘lơ̆ng, mă ƀlep, ưh kơ koă kơ lê̆.

Đơ̆ng sơnăm 2021 truh dang ei, Thủ tướng Teh đak hlôi tơlĕch 4 tơdrong jang pơting dih băl lơ̆m teh đak, adoi hơnơ̆ng tơlĕch 3 tơdrong jang pơting dih băl. Jơnŭm hơlen, rim tơdrong pơgơ̆r pơting dih băl kơ yuơ Thủ tướng teh đak tơlĕch đei tơlĕch jang kiơ̆ hrơ̆p mĭnh ‘măng, iŏk đei jơnei hơ iă, jĭ tơdrong kăl, pơchoh trong ăn rim tơdrong jang pơting dih băl. Pơma pơtôch hop akŏm, Thủ tướng Phạm Minh Chính hôn bơnê hơnăp jang păng tơdrong tơgop kơtang đơ̆ng rim hơnih bơ̆ jang, tơring, khul jang păng kon pơlei hlôi jang kiơ̆, tơlĕch jang jơnei rim trong jang pơting dih băl. Thủ tướng pơma hơdăh, tơdrong jang pơting dih băl ‘mêm kơ eng teh đak păng bơ̆ jang pơting dih băl pôk hơpăh ‘noh ƀar tơdrong ling lang tơgoăt dih băl kơjăp, jĭ minh lơ̆m dôm jơhngơ̆m pran kơ hơdrĕch hơdrung, kơ teh đak.