Tơ̆ jơ sơng, 2 ‘nu kơdră tơchĕng ‘lơ̆ng găh dôm tơdrong jang tŏk lơ̆m tơdrong pơ vei đơ̆ng 2 Đảng, 2 tĕh đak khei ‘năr âu ki, pơma nuh găh dôm trong jang vă atŏk tơiung tơdrong pran ‘lơ̆ng đơ̆ng 2 păh, pơm hơtŏk hlŏh dơ̆ng tơdrong pơvei jang hơdoi đơ̆ng 2 păh, mă loi jĭ đơ̆ng dôm tơring găh Việt Nam hăm dêh char Vân Nam tơ̆ hơnăp kơnh.

Thủ tướng hơpơi ‘mĕh truh âu kơnh, rim anih jang kơpal, tơring tơrang đơ̆ng 2 păh jang ‘lơ̆ng 1,2 tơdrong ‘nâu: Mă mĭnh, vei kơjăp tơdrong tơbôl, pơgơ̆r tơƀâp, pơma nuh hơnơ̆ng. Mă 2, pơih xă tơdrong jang hơdoi 2 păh đei yoa ngăl hăm tơdrong tơm ‘nŏh pơm tơplih ‘lơ̆ng găh jang hơdoi mŭk drăm – tĕch mơdro, pơm tơƀưh trong tĕh, trong gre treng, chă tơmang lăng păng pơtho pơhrăm. Mă 3, hơnơ̆ng jang hơdoi kơjăp lơ̆m tơdrong vei lăng tơring sơlam tơ̆ kông kơ Việt Nam - Trung Quốc.